"Vota për opozitarët e opozitës është votë për Ramën", Berisha për partitë e reja: Unë i ftova në koalicion, ata zgjodhën t'i shërbejnë të keqes

sali berisha

TIRANË- Kryedemokrati Sali Berisha duke iu drejtuar kandidatëve për deputetë në qarkun e Tiranës, tha se nuk duhet të refuzojnë asnjë debat televiziv, për atyre që janë partitë e reja. 

Ai tha se ndonëse i kishte ftuar në koalicion dhe ata nuk pranuar, përsëri nuk pajtohet me shtypjen që sipas tij, Rama u bën partive të vogla. Por Berisha theksoi gjithashtu se vota për këto parti shkon në favor të kryeministrit. 

"Në debatet televizive nuk do refuzoni, përveç atyre që janë me opozitarë të opozitës. Me ata nuk keni ndonjë punë ju. Që ta dini ju, unë e kam thënë publikisht, unë i ftova ata atë ditë, por ata nuk erdhën. Unë e dijë që ata kanë qëndrime të ndryshme nga ne, por përsëri nuk pajtohem me këtë shtypje që ai u bën partive të vogla.

Nuk mund të pajtohem se kjo është antipluralizëm. Është antidemokratike. Dhe ju premtova dhe prapë u premtoj që do bëjmë gjithçka për të ndryshuar këtë ligj. Ky është ligj antidemokratik. Nuk është e vërtetë që ky është ligji ynë. Jo, absolutisht. Në reformën e vitit 2008, çdo parti kishte zërin e vet të votave.

Bëje koalicion, por anëtarët e saj votonin për partinë e vet. Mirëpo ato nuk gjetën kurajo dhe forcë të dalin nga orbita e opozitarëve të opozitës dhe rrinë në shërbim të të keqes së madhe. Edhe në qoftë se nuk duan, por në fakt ato vota i shkojnë në favor Edi Ramës. Megjithatë ne kemi frontin opozitar më të gjerë të krijuar dhe vazhdojmë këtë betejë me bindje dhe optimizëm të madh se do bindim qytetarët shqiptarë që më 11 maj të votojnë për projektin më të mirë që ata kanë pasur ndonjëherë përpara, projektin e Shqipërisë Madhështore.", tha Berisha.