Një pedagoge ka shpërthyer kundër kryeministrit Edi Rama, duke e cilësuar si turpin e vendit, dhe duke shtuar se ai duhet të largohet...
POLITIKE
Vrasja e gjyqtarit Kalaja, Gazment Bardhi: Ministra Koçiu të japë dorëheqjen, kërkojmë shpjegim nga kryeministri
PiranjatPërditësimi i fundit 9 Tetor 2025, 10:35
Gjatë seancës në Kuvend, deputeti i Partisë Demokratike, Gazment Bardhi, ka kërkuar dorëheqjen e ministrës së Brendshme, Albana Koçiu, dhe shpjegime nga kryeministri Edi Rama pas vrasjes së gjyqtarit Astrit Kalaja në sallën e gjyqit.
Bardhi e cilësoi si "të paimagjinueshme" që një gjyqtar të vritet në sallën e gjyqit dhe e akuzoi qeverinë për neglizhencë në garantimin e sigurisë në institucionet e drejtësisë. Ai theksoi se kjo ngjarje nuk mund të kalojë si një "çështje e zakonshme" dhe kërkoi që ministrja Koçiu të japë dorëheqjen për përgjegjësitë e saj, ndërsa kryeministri të japë shpjegime për mungesën e masave të sigurisë në gjykatat e vendit.
"Seanca e sotme duhet të niste me dorëheqjen e ministres së Brendshme. Është e paimagjinueshme që një gjyqtar të vritet në sallën e gjyqit. E paimagjinueshme që ministrat të gënjejnë dhe të thonë se policia e shtetit nuk ka detyrime për të garantuar sigurinë në institucionet e drejtësisë", tha Bardhi.
Ai gjithashtu u shpreh se kjo është një ngjarje që është e pamundur të kalojë pa pasur një përgjigje serioze nga qeveria, duke kërkuar që Rama të shpjegojë pse për tre vite nuk është përgjigjur kërkesës së organeve të drejtësisë për të shtuar masat e sigurisë në gjykata.
"Kjo çështje nuk mund të kalojë si një çështje dite. Kurrë në histori nuk ka ndodhur që një gjyqtar të vritet në sallën e gjyqit. Ministrja e Brendshme duhet të japë dorëheqje dhe Rama duhet të vijë dhe të japë shpjegime se përse për tre vjet nuk ka ndërmarrë masa për të shtuar sigurinë me punonjës policie në gjykatat e vendit", përfundoi Bardhi.
