Zbarkimi i agjentëve të BKH-së në rezidencën "Kodra e Diellit", kontrollet u zhvilluan në një apartament pranë banesës së Veliajt

TIRANË- Detaje të reja janë zbardhur në lidhje me zbarkimin e agjentëve të BKH-së në rezidencën 'Kodra e Diellit'. Fillimisht u raportua se agjentët e BKH-së kanë zhvilluar kontrolle në banesën e kryebashkiakut të Tiranës, Erion Veliajt.

Nga pamjet e publikuara dukej mjeti i oficerëve që është parkuar jashtë ambienteve të banesës së Veliajt. Më tej bëhet me dije se kontrollet janë zhvilluar në një apartamet pranë banesës së Veliajt. Avokatët e Erion Veliajt deklarojnë se kontrollet e BKH-së nuk kanë lidhje me Veliajn, pasi nëse do të ishin për të, do të ishin edhe ata të pranishëm gjatë kontrolleve.

Agjentët e BKH-së raportohet se kanë qëndruar përreth dy orë, ndërsa pritet që në vijim të mësohet se në banesën e kujt janë bërë kontrollet dhe me çfarë hetimi lidhen. Në dhjetor të 2024, oficerët e BKH kanë shkuar për kontroll në shtëpinë e Erion Veliajt, ndërkohë që ky i fundit nuk ndodhej në banesë.

Veliaj u arrestua në zyrën e Bashkisë më 10 shkurt si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”. Bashkëshortja e kryebashkiakut, Ajola Xoxa është lënë në masë sigurimi "detyrim paraqitje". 

Sipas SPAK nga të dhënat konkrete të mbledhura deri në këtë fazë të hetimit paraprak, në mënyrë të përmbledhur rezulton se, nga personat nën hetim, specifikisht Veliaj edhe bashkëshortja e tij është ideuar, krijuar dhe vënë në funksionim një mekanizëm që ka synuar dhe ka bërë të mundur, në praktikë, marrjen e përfitimeve të parregullta, të cilat burojnë nga fondet publike që administrohen nga Bashkia Tiranë, përmes titullarit të saj, me qëllim pasurimin personal të këtij të fundit dhe familjes së tij, përmes veprimeve të kamufluara dhe të  kundërligjshme.