Një aksident rrugor me përplasjen e tre automjeteve ka ndodhur mbrëmjen e së dielës në autostradën Rrogozhinë-Lushnj&eum...
BOTA
Shkencëtarja e Universitetit të Cambridge humb jetën në aksidentin tragjik hekurudhor në Spanjë, po udhëtonte për të marrë një çmim
PiranjatPërditësimi i fundit 1 November 2026, 21:43
Një prej viktimave të aksidentit të rëndë hekurudhor në Spanjë është edhe shkencëtarja e njohur e Universitetit të Cambridge, Dr. Marta Shahbazi. Ajo humbi jetën teksa udhëtonte drejt një ceremonie në të cilën do të nderohej për kontributin e saj të rëndësishëm në fushën e kërkimeve shkencore.
Shahbazi ndodhej në trenin që u përplas me një tjetër pranë Urda-s, në jug të Madridit, në një aksident tragjik që u mori jetën 69 personave. Shkencëtarja ishte nisur drejt Andaluzisë, ku do të merrte një çmim nga Shoqata Spanjolle e Biologjisë Zhvillimore për punën e saj në studimin e zhvillimit të hershëm të embrionit njerëzor.
Dr. Shahbazi ishte profesoreshë e asociuar në Universitetin e Cambridge dhe drejtonte një grup kërkimor në Laboratorin e Biologjisë Molekulare MRC (LMB), ku ishte pjesë e komunitetit shkencor që prej vitit 2020. Ajo kishte fituar vlerësime të shumta për studimet mbi zhvillimin e embrioneve njerëzore dhe biologjinë qelizore.
Lajmi për vdekjen e saj ka shkaktuar tronditje te kolegët dhe komuniteti akademik në Cambridge. Në një deklaratë, Laboratori i Biologjisë Molekulare e përshkroi atë si një shkencëtare frymëzuese, të talentuar dhe plot pasion, duke e cilësuar humbjen e saj si një goditje të rëndë për institucionin.
“Marta ishte një shkencëtare frymëzuese, e talentuar dhe plot pasion, kërkimet e së cilës ndriçuan hapat më të hershëm të zhvillimit të embrioneve njerëzore dhe mënyrën se si ndodhin gabimet që çojnë në dështimin e shtatzënive”, thuhet në reagimin e institutit.
Shahbazi ishte gjithashtu nënë e dy fëmijëve. Në deklaratën e tij, laboratori vuri në dukje se ajo kishte folur shpesh për sfidat e balancimit të jetës familjare me karrierën akademike, duke shërbyer si një model frymëzues për gratë që ndërtojnë një karrierë shkencore ndërsa rrisin fëmijët.
Drejtori i Institutit të Qelizave Staminale të Cambridge, profesori Bertie Gottgens, u shpreh se komuniteti akademik ishte i tronditur dhe thellësisht i pikëlluar nga lajmi. Ai vlerësoi kërkimet novatore të Shahbazi në fushën e zhvillimit të hershëm njerëzor, si dhe frymën e saj bashkëpunuese.
Para se t'i bashkohej Universitetit të Cambridge, shkencëtarja kishte kryer doktoraturën në Qendrën Kombëtare Spanjolle të Kërkimeve mbi Kancerin. Më pas kishte punuar si studiuese pas doktoraturës në Cambridge, përpara se të bëhej pjesë e Laboratorit të Biologjisë Molekulare në vitin 2020.
Aksidenti ndodhi kur një tren me shpejtësi të lartë i kompanisë shtetërore Renfe u përplas me pjesën e pasme të një treni të ndaluar, që operohej nga kompania Iryo. Në të dy trenat ndodheshin më shumë se 540 persona, ndërsa bilanci paraprak i tragjedisë ishte 69 viktima.
Ngjarja konsiderohet një prej aksidenteve më të rënda hekurudhore në historinë moderne të Europës dhe më i rëndi në Spanjë që prej vitit 2013. Pas tragjedisë, autoritetet spanjolle shpallën tre ditë zie kombëtare në nderim të viktimave.
