Ditën e sotme dollari amerikan në blerje do të këmbehet me 81.5 lekë, në shitje me 82.5 lekë.
Euro do të blihet me 93...
SPORT
Rezultate surprizë apo sinjal që prokuroria të zbarkojë në FSHF? E shtuna e dyshimtë e Superligës shqiptare
PiranjatPërditësimi i fundit 2 Maj 2026, 20:51
Federata Shqiptare e Futbollit po përballet me një skandal që ngre dyshime serioze mbi integritetin e Superligës, kampionatit që konsiderohet si niveli më i lartë i futbollit në Shqipëri.
Sot pasdite, katër skuadrat e fundit të renditjes arritën fitore ndaj ekipeve të kreut, disa prej tyre madje në transfertë, edhe pse teorikisht diferencat në cilësi dhe në objektiva janë tepër të mëdha.
Dakord, futbolli për këtë është i bukur, sepse dhuron surpriza dhe luftë të fortë deri në rënien e bilbilit, por kur këto “surpriza” ndodhin njëkohësisht në katër stadiume, atëherë jemi përballë një situate që ngre dyshime dhe, natyrisht, edhe shumë pyetje.
Por çfarë ishte në të vërtetë kjo e sotmja, një ditë e jashtëzakonshme për skuadrat e vogla, që njëlloj si Davidi mundën Goliathin, apo ishte një sinjal që gjërat në Superligën shqiptare kanë marrë tatëpjetën?
Vora me Elbasanin ishte ndeshja e parë që ra në sy të bookmakers-ave, të cilët e hoqën menjëherë nga kuotat e basteve, por ndërkohë që të gjithë thërrisnin ujku, çakenjtë po bënin kërdinë. Bylisi gjunjëzoi Vllazninë në “Loro Boriçi” përballë tifozëve të shtangur që nuk i besonin syve, ndërkohë që Flamurtari mundi Partizanin dhe Tirana Teutën brenda në Durrës. Sa shumë “rastësi” në dy orë.
Këto “surpriza”, në terma ndërkombëtarë quhen “red flag” dhe natyrisht duhet të kenë një verifikim të menjëhershëm nga organet ligjzbatuese, sepse në çdo vend normal, situata të ngjashme aktivizojnë mekanizma hetimi, nga federatat, kompanitë e monitorimit të basteve dhe në fund nga autoritetet hetimore.
Por në Shqipëri, kjo nuk ndodh. Të paktën deri në këtë moment.
Federata Shqiptare e Futbollit, që drejtohet prej më shumë se dy dekadash nga Armando Duka, duhej të ishte e para që të reagonte, sepse është përgjegjësja kryesore për garantimin e integritetit të kampionatit. Publiku shqiptar meriton të sqarohet nëse janë analizuar këto ndeshje dhe a do të nisë një hetim nga komisionet përkatëse të këtij institucioni.
Dakord, historia e futbollit ndërkombëtar na mëson se rastet e trukimit të ndeshjeve kanë qenë dhe janë prezent, edhe në kampionate elitare, por një trukim në bllok i të gjitha ndeshjeve, kjo zor që të ketë ndodhur në një vend ku luhet futboll normal. Dhe këtë “sukses” të futbollit normal dhe të pastër, Federata e zotit Duka e pretendon prej vitesh.
Sidoqoftë, pyetja që mund të bëjmë pas kësaj dite, ku dyshimi i lë vendin thuajse sigurisë, është e thjeshtë:
A do t’i hetojë prokuroria këto “surpriza” të katër stadiumeve shqiptare? Do të ishte në nderin e tyre sikur të ndodhte./PiranjatNews
