Kryetari i Partisë Demokratike, Sali Berisha në një konferencë për mediat ka akuzuar Edi Ramën se, po dhunon studentët dhe pr...
AKTUALITET
Vrau shqiptarin Denaldo Maxhalaku dhe fshehu trupin në pus, gjykata vendos për 29-vjeçarin italian
PiranjatPërditësimi i fundit 31 October 2026, 18:26
Gjykata e Forlit në Itali ka konfirmuar arrestimin e Daniele Sartinit, 29-vjeçarit nga Longiano, i akuzuar për vrasjen e shqiptarit Denaldo Maxhalaku, 31 vjeç. Sipas mediave italiane, Sartini është i vetmi person nën hetim për vrasjen e 31-vjeçarit shqiptar, trupi i të cilit u gjet në fund të një pusi në zonën Felloniche, në Longiano, pas 21 ditësh nga momenti i krimit.
Gjatë daljes para gjyqtarit hetues, 29-vjeçari ka pranuar sërish autorësinë e vrasjes, duke pretenduar se kishte vepruar nga frika për jetën e tij dhe të familjarëve. Hetuesit dyshojnë se ngjarja ka ndodhur më 7 tetor, pas një konflikti mes dy personave për një borxh prej 1,500 eurosh, që lidhej me shitjen e kokainës.
Sipas dëshmisë së dhënë nga Sartini, Denaldo kishte shkuar në banesën e tij për të kërkuar paratë. Pas një debati mes tyre, i dyshuari ka marrë një armë zjarri dhe, pasi shqiptari ishte futur në automjetin e tij, e ka qëlluar tri herë përmes xhamit të makinës.
Më pas, ai dyshohet se ka transportuar trupin e viktimës dhe e ka hedhur në një pus pranë banesës, ndërsa më vonë ka djegur automjetin e shqiptarit në përpjekje për të zhdukur gjurmët.
Një nga elementet kryesore që çoi në identifikimin e autorit të dyshuar ishin të dhënat e telefonit të tij celular. Përmes regjistrimeve telefonike dhe analizimit të lëvizjeve, hetuesit arritën të rindërtonin itinerarin e 29-vjeçarit para dhe pas ngjarjes.
Prokurori i Forlì-t, Enrico Cieri, deklaroi se nga hetimet paraprake dyshohet që Sartini ka vepruar i vetëm, pa ndihmën e personave të tjerë. Ai theksoi gjithashtu se përgjegjësia penale mbetet për t'u përcaktuar nga procesi gjyqësor. Ndërkohë, autoritetet italiane po përgatiten për zhvillimin e një gjykimi të përshpejtuar, ndërsa autopsia e trupit të 31-vjeçarit është planifikuar të kryhet të hënën.
Denaldo Maxhalaku ishte me origjinë shqiptare, jetonte në Gatteo dhe punonte si piktor. Ai la pas bashkëshorten e tij 20-vjeçare dhe vajzën e vogël vetëm një vjeçe. Gruaja e tij kishte denoncuar më herët zhdukjen, duke treguar se e priste bashkë me vajzën në shtëpi dhe se Denaldo ishte një bashkëshort i përkushtuar dhe baba i dashur.
