Aksident rrugor në autostradën Rrogozhinë-Lushnjë, një person dërgohet me urgjencë në spital

Një aksident automobilistik është regjistruar në autostradën Rrogozhinë-Lushnjë, pranë fshatit Gramsh, ku janë përfshirë dy automjete, një Audi dhe një Skoda. Si pasojë e përplasjes, ka mbetur i dëmtuar drejtuesi i mjetit tip Audi, i cili është transportuar me urgjencë drejt spitalit të Lushnjës për të marrë ndihmë mjekësore.

Sipas informacioneve paraprake, Audi dyshohet se po lëvizte me shpejtësi të lartë kur ka përplasur nga pas automjetin tip Skoda. Nga goditja, ky i fundit është përplasur me barrierën ndarëse prej betoni dhe ka dalë jashtë autostradës.

Drejtuesi i Audi-t ndodhet jashtë rrezikut për jetën, ndërsa drejtuesi i Skodës ka pësuar dëmtime të lehta dhe nuk ka pranuar të transportohet në spital. Në vendngjarje kanë mbërritur efektivët e Policisë, të cilët po punojnë për dokumentimin e aksidentit dhe disiplinimin e trafikut.