Kreu i Partisë Demokratike Sali Berisha komentoi zgjedhjet në Serbi, teksa Aleksandar Vuçiç ra nga pushteti pas 14 vitesh.
Berisha u ...
AKTUALITET
Avokati i Popullit raport për shoqërimin e Erion Veliajt në spital: Polici i pranishëm gjatë kolonoskopisë. U cenua dinjiteti
PiranjatPërditësimi i fundit 25 Dhjetor 2025, 18:04
Avokati i Popullit ka kryer një inspektim për shoqërimin e kryetarit të Bashkisë së Tiranës, Erion Veliaj, në ambientet e një klinike private në Durrës më 17 korrik.
Në raportin e bere, pas ankesës nga vetë Veliaj, Avokati i Popullit thekson se nuk është respektuar dinjiteti njerëzor dhe ai i privatësisë. Vetë Veliaj theksonte se gjatë kryerjes së klizmë/kolonoskopisë dhe ekzaminimit, ka qenë të pranishëm në të njëjtën dhomë, punonjësit e policisë së burgjeve. Mjeku, në shpjegimet që i ka dhënë Avokatit të Popullit, thotë se Veliaj ka shprehur shqetësimin e tij për praninë e punonjësve të policisë, brenda dhomës ku do të kryhej ekzaminimi.
Në raport thuhet midis të tjerash se mjeku u ka kërkuar punonjësve të policisë, që të presin jashtë dhomës, deri në përfundim të ekzaminimit, por ata nuk kanë plotësuar kërkesën, me pretendimin e rregullores së sigurisë.
“Në rastin konkret, gjatë kryerjes së ekzaminimeve dhe konsultave, prezent me të paraburgosurin ka qëndruar 1 punonjës policie”, thekson raporti. Raporti i Avokatit të Popullit thekson se ekzaminimet mjekësore duhet të kryhen me respekt të plotë të privatësisë së personit. “Prania e stafit të sigurisë gjatë ekzaminimit apo konsultave, duhet të lejohet vetëm kur plotësohen dy kushte: E kërkon shprehimisht mjeku për arsye të sigurisë së tij; - e ka vlerësuar Stafi multidisiplinar i IEVP-së për shkak të rrezikshmërisë që paraqet i burgosuri”, thuhet më tej.
Në fund të raportit, institucioni i Avokatit të Popullit rekomandon ndryshimin e Urdhrit të Drejtorit të Përgjithshëm të Burgjeve Nr.651, datë 21.01.2019 “Për miratimin e procedurës së transportimit dhe shoqërimit të të burgosurve”, me qëllim marrjen e masave të sigurisë nga ana e Drejtorisë së Përgjithshme të Burgjeve, në rastin kur të burgosurit, kryejnë ekzaminime/konsulta mjekësore jashtë ambienteve të burgut.
Avokati i Popullit kërkon që vlerësimi i rriskut të kryhet në varësi të formularit të plotësuar nga IEVP-të, duke përmbushur standardet kombëtare dhe ndërkombëtare, për respektimin e dinjtitetit njerëzor, të drejtës për jetë private, si dhe parimit të konfidencialitetit mjekësor.
