Ambasadori i Gjermanisë në Shqipëri, Karl Bergner i kujton kryeministrit Rama se në rrugën për integrimin në B...
AKTUALITET
Baki Goxhaj: Na qëlluan me armë! Më lidhën sytë e më tërhoqën zvarrë! Vec bukë e ujë, na trajtuan si bagëti
PiranjatPërditësimi i fundit 22 Maj 2026, 13:16
Aktivisti shqiptar Baki Goxhaj është kthyer në Shqipëri pasi u ndalua nga autoritetet izraelite gjatë pjesëmarrjes në një flotilje ndërkombëtare me destinacion Gazën. Ai mbërriti në aeroportin ndërkombëtar Tirana International Airport Nënë Tereza, ku u prit nga familjarët e tij dhe më pas u shoqërua për procedura verifikimi në komisariatin e Rinasit, ku qëndroi për rreth dy orë.
Goxhaj ishte pjesë e një misioni aktivistësh që synonin të dërgonin ndihma dhe të tërhiqnin vëmendjen mbi situatën humanitare në Gaza. Sipas tij, flotilja u ndalua në ujëra ndërkombëtare nga forca detare izraelite gjatë rrugës drejt destinacionit.
Në deklaratën e tij të dhënë pas mbërritjes, Goxhaj ka përshkruar një situatë të rëndë gjatë ndalimit dhe transportimit të pjesëmarrësve në flotilje.
“Unë jam nga Vlora dhe vitet e fundit jam angazhuar si aktivist për çështjen palestineze, për t’i dhënë fund gjenocidit dhe për zgjidhjen e kësaj çështjeje që po zgjat prej 80 vitesh si një plagë e hapur në botën moderne. Organizata që merret me organizimin e flotiljes është online dhe ka hapur aplikime për t’u bërë pjesë e flotiljes. Edhe unë, pasi u informova, ndoqa procedurat për t’u bërë pjesë e saj.
Rreth 10 ditë më parë u nisëm. Ne ishim në ujëra ndërkombëtare kur pamë disa anije të mëdha dhe dy skafe të fuqishëm që po afroheshin. Pavarësisht përpjekjeve për t’u larguar, nuk ishte e mundur. Duke u afruar, na kërcënuan dhe qëlluan me armë; nuk e di nëse ishin plumba të vërtetë.
Hipën në anije, na lidhën duart të gjithëve; mua më lidhën edhe sytë, sepse isha pak i zëshëm duke kërkuar të na lironin. Na morën zvarrë dhe na çuan në një anije të madhe të sajuar me kontejnerë, ku kemi qëndruar 2 ditë e 2 net si bagëti. Në anije kishim vetëm ujë për të pirë dhe bukë të thatë.
Kam qenë aty dhe e kam parë me sytë e mi; kam dëgjuar një vajzë palestineze jo shumë larg meje që më pas u dhunua. E kam parë gjithë skenën”, tha Goxhaj.
Sipas tij, pjesëmarrësit në flotilje kanë qenë në kontakt me përfaqësues institucionalë gjatë ndalimit, përfshirë edhe një ministër që ka mbërritur në vendngjarje gjatë procedurave.
Pritet që Goxhaj të japë dëshmi të mëtejshme mbi përvojën e tij gjatë ndalimit në ditët në vijim.
