Një nënë nga Korça, Volsjana Plasa, denoncon se djali i saj 4-vjeçar është dhunuar nga edukatorja në kopshtin nr. ...
AKTUALITET
Dibër dhe Lezhë, 400 milionë euro për rrugë që rrezikojnë jetën e qytetarëve
PiranjatPërditësimi i fundit 4 Mars 2026, 22:49
Ju treguam disa nga rrugët e ndërtuara gjatë dy mandative të fundit të Edi Ramës në qarkun e Vlorës, Beratit dhe Gjirokastrës, ku investimi në vetëm segmented e shembura ka kushtuar mbi 130 milionë euro. Ju treguam gjithashtu se këto rrugë janë ndërtuar gjithashtu nga kompanitë e preferuara të Ramës dhe Ballukut, ndërsa janë avulluar qindra milionë euro, sot këto akse rrezikojnë tu marrin jetën qytetarëve.
Në vijim do të zhvendosemi në veri të Shqipërisë, në qarkun e Dibrës, ku Balluku ka qenë ish-drjejtuese politike e PS dhe në qarqe të tjera të rajonit verior, ku rrugët e florinjta po shemben çdo ditë, ndërsa kostoja e tyre është më shumë se 400 milionë euro.
RRUGA E ARBERIT, TUNELI I MURRIZIT 370 MILIONE EURO
Këto janë pamjet që tregojnë dëmtimin e skarpatave në rrugën e Arbërit. Kjo e fundit, u ka kushtuar xhepave të qytetarëve më shumë se 370 milionë euro dhe pritet që kostot të rriten. Shembja e skparatave në rrugën e Arbërit, kanë ndodhur në segmentin nga Shkalla e Tujanit deri në afërsi të Tunelit të Murrizit. Dhe vetëm për këtë segment, me objekt të qartë mbrojtjen e skarpatave të maleve, qeveria shqiptare ka investuar më shumë se 13 milionë euro. në vitin 2022, ARRSH shpalli një tender me vlerë 13.3 milionë euro, i cili kishte si objekt sistemimin dhe rivitalizimin e skarpatave në Shkallën e Tujanit tenderi u fitua nga bashkimi i “Ante-Group” & “FERRO BETON & CONSTRUCTION CO” & “BILGIN TAAHHUT INSAAT MADENCILIK SANAYI VE TICARET LTD”, ndërsa u klasifikua me flamur të kuq për shkak të skualifikimit të ofertës më të ulët ekonomike.
Afati i punimeve për mbrojtjen e skarpatave ishte 18 muaj, por në 29 shkurt 2024, në afërsi të shkallës së Tujanit një masiv i madh shkëmbor u shkëput nga mali duke bllokuar totalisht rrugën, ndërsa shembjet aktuale rrezikojnë të bëjnë të njëjtën gjë.
Jo vetëm skarpatat e malit, por edhe vet tuneli i Murrizit, duket se është në rrezik. Në rrjete sociale por edhe deputetja e PD, Denisa Vata kanë publikuar pamje që tregojnë se në tunelin e Murrizit futet ujë me sasi të mëdha, duke vënë në pikëpyetje sigurinë e tij.
UNAZA E BURRELIT 1.3 MILIONE EURO
Më 8 janar të këtij viti, Unaza e spo ndërtuar e Burrelit, u shemb. Siç shihet nga pamjet, rruga ka pësuar një fundosje të madhe me rreth 1 metër, duke e bërë këtë segment me gjatësi prej 1.4 km të pakauleshëm për automjetet.
Unaza e Burrelit duket se është një tjetër histori korrupsioni me ndërtimin e rrugëve, së paku kështu kuptohet nga vetë institucionet. Në vitin 2020, me një shkresë, ish-kryebashkiaku i Matit, Agron Malaj, i kërkon ARRSH që një segment prej 1.4 km të unazës së qytetit ta përfshijë në akset kombëtare dhe për rrjedhojë ky segment të tenderohet dhe rikonstruktohet nga fondet e buxhetit të shtetit. Në janar 2025, vetëm pak muaj nga nisja e fushatës për zgjedhjet e majit, ku Agron Malaj la bashkinë për tu bërë deputet, e përdori këtë segment si asfalt elektoral për qytetarët e Matit.
ARRSH shpalli tenderin për ndërtimin e rrugës në dhjetor 2024, ndërsa fituesi u shpall në 6 janar. Në farë morën pjesë pesë kompani, por në fund fituese u shpall një nga të preferuarat e Agron Malajt, ULZA shpk. Ky tender u klasifikua me flamur të kuq për skualifikim të të gjithë operatorëve të tjerë në garë dhe mbi të gjitha për skualifikimin e ofertës me vlerë më të ulët ekonomike.
Fondi limit i tenderit ishte 1.2 mln euro, ndërsa Ulza e fitoi këtë tender me rreth 1.3 mln euro me TVSH. Sipas një shkrese zyrtare të publikuar nga deputetja e Partisë Demokratike Denisa Vata, rezulton se projekti për rrugën është bërë nga bashkia Mat, kjo vërtetohet edhe nga dokumentet e tenderit të publikuar në Open Data.
Sipas shkresës që ARRSH i ka kthyer përgjigje deputetes, rezulton se në projektin që Agron Malaj ka bërë nuk është parashikuar rrëshqitje e tokës ndaj dhe nuk ka marrë masa inxhinikerike për trajtimin e tyre. Ndaj mjafton vetëm kaq që prokuroria të nis hetimet mbi studimin e projektit, që mban firmën e ARABEL-STUDIO.
RRUGA DERJAN MACUKULL 540 MIJË EURO
Një tjetër rrugë me asfalt elektoral, që duket se i ka shërbyer ekskluzivisht Agron Malajt për vota në zgjedhjet e 11 majit, është dhe ajo që lidh fshatin Burgajet me fshatin Macukull, me gjatësi rreth 8.7 km.
Kjo rrugë, sipas një përgjigje të Fondit shqiptar të Zhvillimit për emisionin Plug, u rikonstruktua gjithashtu gjatë mujave të parë të vitit 2025 ndërsa punimet përfunduan në muajin prill, vetëm pak javë para zgjedhjevet të 11 majit.
Rruga u ndërtua nga kompania BAMI shpk, me mbikqyrës punimesh THC shpk dhe ARABEL STUIDO, e cila më herët kishte projketuar segmentin e shembur të unazës së Burrelit.
Sipas FSHZH, Objekti është në periudhë garancie për një periudhë 40 mujore, gjatë së cilës sipërmarrësi i punimeve mban përgjegjësi për riparimin e defekteve që mund të japin punimet e kryera. Por, edhe kjo rrugë u shemb vetëm pak javë më parë, duke rrezikuar izolimin e banorëve të tre fshatrave.
RRUGA E RE E LURES
Në rrjete sociale, janë publikuar së fundi edhe pamje që tregojnë shembje në pjesë të aksit rrugor Lurë-Peshkopi. Rruga u rikonstruktua vetëm një vit më parë, me financim të Fondit Shqiptar të Zhvillimit, në kuadër të një fondi prej 40 milionë eurosh që Bashkimi Europian ka vënë në dispozicion të qeverisë shqiptare për investimet në infrastrukturë në zonat turistike. Siç shihet nga pamjet e publikuara në rrjete sociale, shtresat asfaltike të rrugës janë si tapet i holl, ndërsa segmenti nuk ka asnjë përforcim në skarpata apo muret mbajtëse të rrugës.
SHENGJIN – VELIPOJE 15 MLN EURO
Rruga panoramike Shëngjin-Velipojë, u inagurua gjithashtu nga Kryeministri Edi Rama gjatë fushatës elektorale të vitit 2025. Ai e cilësoi këtë rrugë si segment që do t`i jepte hov zhvillimit të turizmit. Por në 8 dhjetor 2025, edhe në këtë rrugë në një gjatësi prej 50 metrash ka pasur rërshqitje të trupit të rrugës, ndërsa aksi është bllokuar dhe lëvizjae mjeteve bëhet në vetëm një korsi për arsye sigurie.
Rruga Shëngjin –Velipojë nisi të ndërtohej disa vite më parë me një kredi nga BERZH. Firma që ndërtoi aksin është kompania Gener 2 ndërsa janë mbikqyrur nga JV Pace dhe ERALD-G shpk.
Shembja e rrugës ka ndodhur pikërisht në fshatin Baks Rrjoll, aty ku banorët prej javësh protestojnë kundër ndërtimit të një resorti turistik pikërisht nga kompania që mori 15 milionë euro për të ndërtuar këtë rrugë.
Rrugët që përmendë më sipër, në qarkun Dibër dhe Shkodër, kanë kushtuar më shumë se 400 milionë euro, dhe shumica prej tyre kanë vetëm pak muaj që janë inguruar zyrtarisht.
Por këto rrugë, edhe pse kanë kosto marramendëse, nuk kanë mundur t`i rezistojnë as periudhës së garanicsë së punimeve, duke dëshmuar se shembjet në të ardhmen mund të jenë edhe më të rënda.
Në total, janë mbi 1.1 miliardë euro investime në të gjitha rrugët që trajtuam sot në emision, dhe e përbashkëta e shumicës dërrmuese të tyre, nuk janë vetë shembjet. Por, këto janë rrugë të ndërtuara gjatë kohës që Belinda Balluku drejton Ministrinë e Infrastrukturës ndërsa kompanitë që i kanë ndërtuar janë po ato, shumë prej të cilave përmenden në dosjen e Ballukut dhe gjithashtu janë duke u hetuar./ plug
