Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
AKTUALITET
Elbasan/ Rrëshqitje dheu në fshatin Pobrat, banorët: Fëmijët në rrezik, askush nuk ndërhyn
PiranjatPërditësimi i fundit 20 Shkurt 2026, 14:35
Situata në fshatin Pobrat, në Bashkinë e Elbasanit, vijon të mbetet shqetësuese për shkak të gjendjes së amortizuar të rrugës që lidh këtë zonë me pjesën tjetër të vendit.
Prej kohësh, segmenti kryesor ka pësuar rrëshqitje të konsiderueshme të dherave, duke e bërë qarkullimin të vështirë dhe të rrezikshëm për banorët.
Sipas banorëve të zonës, dëmtimet në trupin e rrugës janë thelluar me kalimin e kohës, ndërsa mungesa e ndërhyrjeve ka shtuar frikën për ndonjë aksident të mundshëm.
Problemi bëhet edhe më i mprehtë për fëmijët që detyrohen ta përshkojnë këtë aks çdo ditë për të shkuar në shkollë.
“Çdo ditë kalojmë me frikë. Rruga është e çarë dhe në disa pjesë ka rrëshqitur dukshëm. Mjafton një reshje shiu dhe situata përkeqësohet,” shprehen banorët.
Ata kërkojnë ndërhyrje të menjëhershme për stabilizimin e segmentit të dëmtuar dhe rikonstruksion të plotë të rrugës, duke theksuar se neglizhenca mund të ketë pasoja të rënda.
Ndërkohë, mungesa e investimeve në infrastrukturën rurale vijon të mbetet një problem i pazgjidhur për shumë zona të Bashkisë së Elbasanit, ku banorët ndihen të lënë në harresë dhe pa mbështetje institucionale.
