Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
AKTUALITET
FOTO-EMRI/ Dhomë kanabisi pas dollapit, kush është 33-vjeçari shqiptar i dënuar në Britani
PiranjatPërditësimi i fundit 26 Tetor 2026, 22:01
Një shtetas shqiptar është dënuar me 16 muaj burg në Britaninë e Madhe, pasi kultivonte kanabis në një dhomë të fshehtë, e cila mund të aksesohej përmes një dere të vogël të maskuar brenda një dollapi.
Policia e Kentit zhvilloi një operacion më 4 gusht 2026, në kuadër të një hetimi për krimin e organizuar, në një banesë në Riverbank Way, në Ashford.
Sapo efektivët hynë nga dera kryesore, Marius Dardha tentoi të largohej me vrap drejt oborrit të pasmë, por u ndalua nga policët që ndodheshin në pritje dhe u arrestua.
Gjatë kontrollit, policia zbuloi se pesë dhoma të ndryshme të banesës ishin përshtatur për kultivimin e kanabisit. Mes tyre ishte edhe një dhomë sekrete, e fshehur pas mureve të rreme, ku mund të hyhej duke kaluar përmes një hapësire të vogël brenda dollapit të një bufeje në dhomën e ndenjjes.
Gjatë operacionit u sekuestruan rreth 250 bimë kanabisi në fazë të avancuar të rritjes.
Kontrolli i telefonit të Dardhës zbuloi gjithashtu fotografi dhe video të bimëve, të cilat, sipas hetuesve, sugjeronin se ai ishte përfshirë në furnizimin me kanabis, një drogë e klasit B sipas klasifikimit britanik, që prej shtatorit të vitit 2025.
Dënohet me 16 muaj burg
33-vjeçari, shtetas shqiptar pa një adresë të përhershme, u akuzua për prodhimin e kanabisit, vepër të cilën e pranoi në gjykatë. Më 20 tetor, në Gjykatën e Kurorës në Canterbury, ai u dënua me 16 muaj burg.
Oficerja hetimore, detektivja Heather Walkden, deklaroi se në banesë ishin bërë ndryshime të shumta për krijimin e dhomave të kultivimit të kanabisit, ndërsa hapësirat e tjera përdoreshin për grumbullimin e mbetjeve nga kultivimi.
Sipas saj, banesa ishte në gjendje të keqe dhe ndërhyrjet e paligjshme në instalimet elektrike, për të furnizuar pajisjet e kultivimit, mund të përbënin rrezik serioz për sigurinë e fqinjëve.
“Plantacione të tilla krijohen për të financuar krimin e rëndë dhe kanë një ndikim të dukshëm negativ në komunitetin e gjerë”, deklaroi Walkden.
Ajo shtoi se efektivët kanë përvojë në zbulimin e ambienteve të tilla dhe se e gjetën shpejt dhomën e fshehtë pas derës së dollapit. Në fund, oficerja e policisë e mbylli deklaratën me një koment ironik për të dënuarin: “Fatkeqësisht për Dardhën, e vetmja derë që do të shohë për njëfarë kohe do të jetë ajo e qelisë së burgut”. /PiranjatNews/
