”Gjuj, thika, dhunë”/ Sherri për portën përball ashpër dy komshinjtë! Gratë shahen e pështyhen, burrat grushtohen me njëri-tjetrin

Foto ilustruese

TIRANË- Një sherr banal i nisur për portën dhe një rrugë kalimi ka çuar deri në përplasje fizike dy komshinjtë në Njësinë Administrative Farkë në Tiranë. Në fillim ata shprehen se kishin një marrëdhënie të mirë me njëri-tjetrin, madje konsumonin kafe dhe rrinin bashkë, por kjo nuk do të zgjaste shumë, pasi ajo që në fillim do të ishte një rrugë kalimi e përbashkët do të bëhej “mollë sherri” pas vendimit të Nazmi Boshnjakut për të vendosur një portë, që ta përdorte tashmë vetëm për veten.

Kjo do të nxiste një debat të ashpër dhe do të niste një valë përplasjesh të forta mes dy familjeve. Përplasje që siç do shihet dhe në video, do të çonte në konfortim fizik mes burrave të familjeve, por dhe grave. Ndërsa më keq akoma, në këtë konflikt do të përfshiheshin dhe fëmijët. Më saktë, djali 16-vjeçar i familjes Hyka, i cili sipas Anisës ka nxjerrë dhe një thikë.

Ndërkohë që tensionet janë të vazhdueshme, madje deri në përplasje fizike, sipas Sajde Hykës, institucionet shtetërore nuk kanë marrë asnjë masë. Madje ajo shprehet se ka qenë pikërisht leja e dhënë nga Njësia Administrative Farkë, për portën, ajo që ka nxitur edhe më keq konfliktin e nisur mes dy familjeve. Ndërsa Policia shkon vazhdimisht për të ndarë sherret mes dy familjeve, por fatkeqësisht nuk bën dot gjë më shumë, pasi me tu larguar ato, nis sërish konflikti.

Pasi dëgjuam pretendimet e palëve, takuam kreun e Njësisë Administrrative Farkë, Ardian Tufa. Ky i fundit u shpreh se do të merren masa që të gjendet një topograf që të masë tokat e të dy familjeve dhe të ndajë përfundimisht se sa i takon gjithësecilit. Pasi Xhevahir Boshnjaku shprehet se është në tokën e tij, e po ashtu pala tjetër Sajde Hyka shprehet se është në tokën e saj.

Ndërkohë çështja është në duart e Prokurorisë së Tiranës. Të paktën shpresojmë se derisa të vendosë drejtësia, palët të ruajnë qetësinë dhe të mos ketë gjakëderdhje.