Partia e djathtë gjermane Alternativa për Gjermaninë (AfD) ka kërkuar deportimin e më shumë se një milion refugjatëve,...
AKTUALITET
Italia bën kontrollet: Bllokohen 5.2 ton turshi me pesticide të ndaluara dhe metale të rënda
PiranjatPërditësimi i fundit 12 Qershor 2026, 13:29
Një alarm serioz për sigurinë ushqimore ka hedhur dritë mbi cilësinë e produkteve që përfundojnë çdo ditë në tryezat e konsumatorëve.
Analizat laboratorike të kryera në Itali kanë evidentuar se një pjesë e produkteve të kategorisë “turshi” nuk përmbushin standardet e kërkuara të sigurisë ushqimore. Pas një kërkese zyrtare të “Ora News” drejtuar AKU-së, ky institucion ka bërë me dije se drejt Italisë janë dërguar gjithsej 38 mostra turshish, nga të cilat 37 janë analizuar, ndërsa një mbetet në pritje të rezultateve përfundimtare. Nga këto, katër mostra janë vlerësuar si jokonforme.
Sipas rezultateve të analizave, në dy prej mostrave është konstatuar prani e metaleve të rënda mbi kufijtë e lejuar, ndërsa dy të tjera kanë rezultuar me mbetje të pesticideve të ndaluara. Kjo nënkupton se në disa produkte janë gjetur substanca që nuk duhet të jenë të pranishme në ushqim, ose duhet të jenë brenda kufijve shumë të rreptë të sigurisë.
Mes produkteve të identifikuara me probleme përfshihen dy mostra “kastravec turshi” me origjinë nga Turqia, një “sallatë e përzier e marinuar” nga Maqedonia e Veriut, si dhe një produkt “perime turshi” me origjinë nga Elbasani.
AKU ka njoftuar se janë bllokuar gjithsej 5,211 kilogramë produkte dhe janë vendosur gjoba ndaj subjekteve përgjegjëse. Ndërkohë, janë kërkuar në mënyrë të përsëritur edhe emrat tregtarë dhe fotografitë e etiketave të produkteve problematike.
Nga 24 mostra të produkteve shqiptare të analizuara, 23 kanë rezultuar të sigurta për konsum, duke përbërë rreth 96% të totalit, ndërsa problematikat më të theksuara janë konstatuar te produktet e importit.
