Pas ditës së pestë të protestës studentore, kryeministri Edi Rama njoftoi se efektivët e angazhuar në protestë do të...
AKTUALITET
Moti i keq vijon edhe nesër, situatë problematike në 8 qarqe të vendit
PiranjatPërditësimi i fundit 6 Janar 2026, 17:17
Instituti i Gjeoshkencave, Energjisë, Ujit dhe Mjedisit (IGJEUM) ka njoftuar se gjatë ditës së sotme dhe nesër priten reshje intensive, kryesisht në veri dhe jug të vendit, duke rritur ndjeshëm rrezikun nga përmbytjet. Sipas institutit, në qarqet Shkodër, Kukës, Dibër, Lezhë, Durrës, Elbasan, Vlorë dhe Gjirokastër mund të ketë vërshime të shpejta të lumenjve të vegjël malorë, si dhe rrëshqitje dherash.
Në zonat urbane të këtyre qarqeve parashikohen përmbytje të lokalizuara, në varësi të gjendjes së sistemit të kanalizimeve.
Në një njoftim të publikuar në rrjetet sociale, IGJEUM bën me dije se, sipas llogaritjeve hidrologjike, reshjet me intensitet të lartë të ditëve të fundit, të cilat pritet të vijojnë deri të enjten, do të sjellin rritje të rrezikshme të prurjeve dhe niveleve të lumenjve Drin-Buna, Mat, Shkumbin dhe Vjosë, si dhe të Liqenit të Shkodrës.
Veçanërisht, lumi Drin-Buna dhe Liqeni i Shkodrës paraqesin rrezik të shtuar për përmbytje gjatë ditës së sotme dhe ditës së nesërme. IGJEUM parashikon se sot pasdite dhe nesër, në qarqet Vlorë dhe Gjirokastër priten reshje intensive deri lokalisht shumë intensive, ndërsa në Shkodër dhe Lezhë reshjet do të jenë intensive. Në qarqet e tjera reshjet parashikohen mesatare deri lokalisht intensive, të shoqëruara me shtrëngata.
Në zonat veriore, lindore dhe juglindore, mbi 1000 metra mbi nivelin e detit, reshjet do të jenë në formë dëbore. Ndërkohë, era pritet të fryjë mesatare deri e fortë në bregdet gjatë pasdites së sotme dhe ditës së nesërme.
