Kreu i degës së Partisë Demokratike në Krujë, Aulon Kalaja, ka denoncuar publikisht presione të dyshuara të policisë n...
AKTUALITET
Numri i përdoruesve celularë ngeli në stanjacion në tremujorin e parë
PiranjatPërditësimi i fundit 29 Maj 2026, 08:05
Numri i përdoruesve të shërbimeve celulare në vend ngelet në stanjacion, pas një tendence disavjeçare në rënie.
Sipas të dhënave nga Autoriteti i Komunikimeve Elektronike dhe Postare (AKEP), në fund të tremujorit të parë të vitit numri i përdoruesve aktivë (i matur si numër i kartave SIM aktive) të këtyre shërbimeve arriti në 2.44 milionë, në rënie me 1.4% krahasuar me fundin e vitit 2025 dhe në një rritje modeste me 0.5% krahasuar me të njëjtën periudhë të një viti më parë.
Tendencë të ngjashme shfaqi edhe numri i përdoruesve të internetit me brez të gjerë nga rrjetet celulare. Numri i përdoruesve të internetit arriti në 2.05 milionë, me një rënie prej 1.4% nga fillimi i vitit, por në rritje me 1.4% krahasuar me të njëjtën periudhë të një viti më parë.
Nga ana tjetër, shifrat e konsumit të shërbimeve celulare vazhdojnë të tregojnë një tendencë afatgjatë të përqendrimit të këtyre shërbimeve tek interneti dhe rënien e shërbimeve të thirrjeve zanore dhe mesazheve të shkruara.
Për tremujorin e parë të vitit, trafiku i të dhënave (internetit) u rrit me 20.7% krahasuar me një vit më parë, ndërsa përdorimi mesatar mujor i të dhënave për përdorues u rrit me 22.5%.
Nga ana tjetër, totali i thirrjeve telefonike dalëse ra me 5.9%, ndërsa numri i mesazheve të shkruara u tkurr me 11.6%. Një përdorues celular konsumoi mesatarisht 126 minuta në muaj thirrje dalëse, shifër kjo 6.2% më e ulët krahasuar me një vit më parë.
Shifrat e përdorimit konfirmojnë thellimin e tendencës që komunikimi të zhvendoset gjithnjë e më shumë te aplikacionet OTT, të bazuara te interneti.
Tregu i shërbimeve celulare prej vitesh po përvijon tendenca të qarta, që tregojnë një numër në rënie përdoruesish. Në dekadën e fundit, numri i përdoruesve aktivë të telefonisë celulare ka rënë me më shumë se 28%.
Pjesërisht, kjo mund të shpjegohet me faktorët demografikë dhe uljen e numrit të përgjithshëm të popullsisë. Në mënyrë kalimtare, kjo rënie është kompensuar pjesërisht nga rritja e numrit të turistëve të huaj, që në disa raste përdorin karta SIM shqiptare gjatë periudhës së qëndrimit. Kjo tendencë është më e theksuar gjatë tremujorit të tretë të vitit, kur edhe numri i turistëve është më i lartë.
Por, nga ana tjetër, ulja e numrit të përdoruesve aktivë pjesërisht është ndikuar edhe nga zhvillimet e brendshme të tregut.
Numri i operatorëve celularë është ulur në dy, nga katër që kishte qenë deri në vitin 2017. Sot është gjithnjë e më pak e përhapur që një përdorues të mbajë më shumë se një numër celular.
Kjo tendencë kishte qenë mjaft tipike afërsisht deri në vitin 2014, kur AKEP ndaloi diferencimin e çmimeve për thirrjet brenda rrjetit dhe ato jashtë rrjetit.
Një faktor tjetër që mund të ketë ndikuar numrin e përdoruesve në vitet e fundit është edhe marrëveshja për heqjen e tarifave roaming në vendet e Ballkanit Perëndimor. Duke qenë se një pjesë e mirë e vizitorëve të huaj në Shqipëri vijnë nga vendet fqinje, ata tashmë nuk e kanë më të nevojshme për të përdorur numra shqiptarë për komunikimin e tyre, gjatë kohës që ndodhen në Shqipëri./MONITOR
