Në mbështetje të studentëve që protestojnë para Ministrisë së Arsimit, protestës i është bashkuar edhe ...
AKTUALITET
U përplas me drejtuesin e Prokurorisë, KLP rrëzon kërkesën e ILD-së për masë ndaj prokurores së Sarandës
PiranjatPërditësimi i fundit 25 Nëntor 2025, 18:44
Këshilli i Lartë i Prokurorisë rrëzoi të martën një kërkesë të ILD-së për masë disiplinore ndaj prokurores Besiana Sadikaj. KLP nuk gjeti shkelje në sjelljen e prokurores Sadikaj dhe rrëzoi si të paprovuara pretendimet e Inspektorit të Lartë të Drejtësisë se ajo kishte cenuar etikën.
Hetimi disiplinor ndaj prokurores Sadikaj u fillua bazuar në ankesat e ish-drejtuesit të Prokurorisë së Sarandës, Kledian Llaho, i cili u shkarkua në gusht nga detyra prej Kolegjit të Posaçëm të Apelimit. Po ashtu, edhe Sadikaj depozitoi gjashtë ankesa ndaj Llahos, bazuar në të cilat KLP caktoi më parë dy masa disiplinore ndaj tij.
ILD pretendoi se Sadikaj kishte kryer veprime në kundërshtim me standardet e etikës, që konsiderohen sjellje të padenja, të pahijshme, pa vetëpërmbajtje, si dhe në shkelje të parimit të garantimit të besimit të publikut tek drejtësia në marrëdhënie me drejtuesin dhe personelin e administratës. ILD parashtroi se sjellja është kryer në zyrën e drejtuesit dhe për rrjedhojë kishte gjasa të ndiqej edhe nga magjistratët e tjerë të së njëjtës zyrë.
Po ashtu, u ngritën pretendime edhe për kontrollin e kryer në kompjuterët e oficerëve të policisë gjyqësore. Gjatë seancave të mëparshme dëgjimore, u pyetën në cilësinë e dëshmitarit edhe oficerë, lidhur me mënyrën e aksesimit të kompjuterëve nga prokurorja Sadikaj.
Të dyja këto pretendime u rrëzuan nga KLP pas hetimit dhe pas dëshmive të personave të përfshirë. Pas mbledhjes në dhomë këshillimi, KLP vendosi të rrëzojë kërkesën e ILD-së.
Autoriteti i Mediave Audiovizive, AMA, gjobiti Radio Televizionin Shqiptar, RTSH, me 100,000 lekë, pas konstatimit se sjellja e moderatores dhe të ftu...
