Kryetari i Partisë Demokratike, Sali Berisha, ka folur për mediat para Kuvendit, ku ka kundërshtuar mënyrën se si, sipas tij, po proc...
AKTUALITET
“Vendimi për Ballukun u diktua”, Gjykata Kushtetuese reagon ndaj akuzave të Berishës
PiranjatPërditësimi i fundit 29 Dhjetor 2025, 18:18
Gjykata Kushtetuese përgënjeshtron deklaratat publike të bëra nga kreu i Partisë Demokratike, Sali Berisha i cili deklaroi më herët gjatë ditës së vendimi i kësaj gjykate u diktua me heqjen e pezullimit nga detyra për ministren e Infrastrukturës, Belinda Balluku.
Gjykata Kushtetuese thekson se bëhet fjalë për një proces kushtetues ende në vijim dhe se çështja do të shqyrtohet në seancë plenare publike më 22 janar 2026, me pjesëmarrjen e institucioneve kryesore shtetërore.
Gjykata u bën thirrje të gjithë aktorëve publikë të tregohen të matur në deklaratat e tyre, për të shmangur çdo paragjykim apo cenim të procesit të rregullt. Njëkohësisht, ajo rithekson përkushtimin për transparencë, respektim të ligjit dhe mbrojtje të pavarësisë së vendimmarrjes gjyqësore.
Reagimi i plotë:
Në vijim të deklaratave mediatike publike, të bëra nga subjekte të ndryshme që ushtrojnë funksione publike ose private, në lidhje me procedurën e ndjekur dhe rezultatin e votimit për vendimmarrjen e Gjykatës Kushtetuese për pezullimin e zbatimit të vendimeve gjyqësore nr.118, datë 19.11.2025, dhe nr.120, datë 22.11.2025, të Gjykatës së Posaçme të Shkallës së Parë për Korrupsionin dhe Krimin e Organizuar, për pjesën që kanë disponuar caktimin dhe vazhdimin e masës ndaluese “pezullimi i ushtrimit të një detyre a shërbimi publik” ndaj shtetases Belinda Balluku, Gjykata Kushtetuese i përgënjeshtron këto deklarata si tërësisht të pavërteta.
Gjykata Kushtetuese risjell në vëmendje se bëhet fjalë për një procedurë gjyqësore kushtetuese në vijim e sipër dhe se, në datën 22.01.2026, do të marrë në shqyrtim në seancë plenare publike çështjen me kërkues Kryeministrin e Republikës së Shqipërisë dhe subjekte të interesuara Presidentin e Republikës, Kuvendin e Republikës së Shqipërisë, Prokurorinë e Posaçme kundër Korrupsionit dhe Krimit të Organizuar dhe Gjykatën e Posaçme e Shkallës së Parë për Korrupsionin dhe Krimin e Organizuar. Për të garantuar procesin e rregullt, sipas standardeve kushtetuese, dhe për të shmangur çdo mundësi paragjykimi, qoftë edhe në dukje, ftohen të gjithë aktorët dhe personat e përfshirë në këtë diskutim publik që të tregohen të matur dhe të kujdesshëm në deklaratat e tyre, duke mos përgojuar gjyqtarë individualë apo institucionin e Gjykatës Kushtetuese në tërësi.
Gjykata Kushtetuese rithekson përkushtimin e saj për ushtrimin e funksionit kushtetues me transparencë dhe respekt të plotë të procedurave kushtetuese e ligjore, duke i bërë përsëri thirrje të gjithë aktorëve për respektimin e integritetit dhe autoritetit të saj, me qëllim sigurimin e besimit të publikut dhe garantimin e pavarësisë së vendimmarrjeve gjyqësore, të cilat në asnjë rrethanë nuk duhet të ndikohen nga çdo keqinformim për publikun, nga cilido subjekt të vijë ai.
