Tensionet e para janë shënuar gjatë protestës së 54-të para Kuvendit të Shqipërisë. Disa prej protestuesve kan&eu...
AKTUALITET
VIDEO/ Stendat e tregtarëve bëhen shkrumb e hi, një ditë pas zjarrit të tmerrshëm tek “5 Maji”
PiranjatPërditësimi i fundit 9 Janar 2026, 08:54
Një ditë pas zjarrit shkatërrimtar që përfshiu tregun e rrobave të përdorura në zonën e “5 Majit”, pamjet që vijnë janë tronditëse.
Aty ku një ditë më parë, në këtë orar, kishte stenda dhe tregtarët nisnin aktivitetin e tyre, sot kanë mbetur vetëm struktura të shkrumbuara, hi dhe mbetje metali. Gjithçka është djegur plotësisht, duke shkaktuar dëme të mëdha materiale për tregtarët e zonës.
Situata mbetet ende problematike, pasi këtë të premte janë riaktivizuar sërish disa vatra zjarri, duke detyruar ndërhyrjen e menjëhershme të forcave zjarrfikëse. Mjetet dhe efektivët ndodhen në terren dhe po punojnë për shuarjen përfundimtare të flakëve, me qëllim shmangien e përhapjes së mëtejshme të zjarrit.
Fatmirësisht, nga ngjarja nuk raportohet për persona të lënduar, ndërsa dëmet materiale vlerësohen të konsiderueshme. Paraprakisht dyshohet se zjarri mund të jetë shkaktuar nga një shkëndijë elektrike, megjithatë shkaqet e sakta pritet të përcaktohen pas përfundimit të hetimeve.
Zjarri i madh ra mbrëmjen e së enjtes në tregun e rrobave të përdorura pranë ish-uzinës “Dinamo” dhe u vu nën kontroll pas disa orësh falë ndërhyrjes së koordinuar të shërbimeve zjarrfikëse dhe Forcave të Armatosura.
Në operacion u angazhuan 15 mjete dhe rreth 70 efektivë nga shërbimet zjarrfikëse të Tiranës, Kamzës, Vorës dhe Elbasanit, si dhe mjete të Forcave të Armatosura dhe 8 autobote të Ujësjellës-Kanalizimeve.
Në vendin e ngjarjes, mbrëmjen e djeshme, mbërritën edhe përfaqësues të lartë të institucioneve, përfshirë prefektin e Tiranës, kryebashkiaken e komanduar Anuela Ristani, si dhe ministren e Brendshme, Albana Koçiu, të cilët ndoqën nga afër situatën dhe koordinimin e operacionit për menaxhimin e emergjencës.
