Ish-ministri i Jashtëm, Ditmir Bushati ka reaguar për herë të parë në lidhje me protestat masive të të rinjve dhe qyteta...
AKTUALITET
Zbulim tronditës në det: Ish-oficeri shqiptar i burgut gjendet pa jetë – Prokuroria italiane zbardh të vërtetën e errët
PiranjatPërditësimi i fundit 31 Gusht 2025, 15:12
Vrasja e Fatos Cenajt në Itali po zbardhet gjithnjë e më shumë nga autoritetet vendase. Sipas mediave italiane, hetimi për vdekjen e 58-vjeçarit ka hyrë në një fazë të re, pasi hetuesit janë të bindur se nuk bëhet më fjalë për një aksident, por për një vrasje të qëllimshme, të lidhur me hakmarrje. Një person është në vëzhgim, ndërsa të dhënat nga kamerat e sigurisë dhe dëshmitë kanë përmbysur pistën fillestare.
Prokurorja Maria d’Arpa po udhëheq hetimet, duke përjashtuar mundësinë e një ngjarjeje aksidentale. Tani ngjarja po trajtohet si një vepër penale e menduar mirë, e cila mendohet të jetë planifikuar jashtë territorit italian. Hetuesit kanë nisur procedurat ndaj një të dyshuari për vrasje me dashje, duke respektuar të drejtën e pafajësisë.
Ngjarja ndodhi më 8 qershor, kur Cenaj, si çdo ditë, po shkonte me triçikletë drejt vendit të punës në një stallë ku punonte me kuajt. Një dëshmitar dëgjoi një krismë arme, dhe pak më vonë, dy roje peshkimi e gjetën të plagosur rëndë. Fillimisht u mendua se kishte rënë, por në spital u zbulua një plagë në kokë nga armë zjarri. Pas tre ditësh në gjendje kritike, ai ndërroi jetë.
Ish-punonjës burgu në Shqipëri, Cenaj jetonte në Fontaniva bashkë me bashkëshorten dhe vajzën. Komuniteti e përshkruan si njeri të qetë dhe punëtor, që kryente detyra të thjeshta në stallë dhe gëzonte respektin e të gjithëve. Pas ngjarjes tragjike, familja e tij është larguar përkohësisht për shkak të frikës.
Për më shumë se dy muaj, karabinierët e Padovës kanë ndjekur çdo gjurmë për të zbardhur të vërtetën. Pamjet filmike dhe dëshmitë nga persona që e njihnin viktimën kanë sjellë përparime në hetim. Ndërkohë, hetuesit po shohin nga e kaluara e tij në Shqipëri për të kuptuar nëse fshihet ndonjë motiv më i thellë pas ngjarjes. Po kryhen intervista me të afërm, miq dhe persona të tjerë që mund të ndihmojnë në zbardhjen e plotë të çështjes./Piranjat.al
