Ditën e sotme vendi ynë pritet të ndikohet nga kushte atmosferike të paqëndrueshme.
Sipas SHMU, moti parashikohet me vranësira me...
LIFESTYLE
Kriza/ Arkivolet kinezë pushtojnë Evropën
PiranjatPërditësimi i fundit 31 October 2026, 22:25
Tregu europian i arkivoleve po përballet me presion gjithnjë e më të madh për shkak të mbërritjes së produkteve kineze me çmime shumë më të ulëta. Kjo konkurrencë po vë në vështirësi prodhuesit e kontinentit, të cilët kanë kërkuar ndërhyrjen e Komisionit Europian.
Gjatë pesë viteve të fundit, një e katërta e kompanive të sektorit kanë mbyllur aktivitetin, ndërsa importet nga Kina janë pothuajse dyfishuar. Shqetësimet nuk lidhen vetëm me çmimet, por edhe me dyshimet për subvencione shtetërore për kompanitë aziatike, përdorimin e substancave potencialisht të rrezikshme dhe praktika të mundshme për shmangien e kontrolleve doganore.
Në pesë vite është mbyllur 25% e prodhuesve në Europë
Sektori i arkivoleve, i cili tradicionalisht mbështetej te prodhimi vendas, po përballet tashmë me pasojat e konkurrencës ndërkombëtare.
Sipas Politico, javët e fundit një delegacion i prodhuesve europianë është takuar me disa zyrtarë të Komisionit Europian, duke kërkuar nisjen e një hetimi antidumping. Qëllimi është të verifikohet nëse kompanitë kineze po i shesin produktet e tyre në Bashkimin Europian me çmime artificialisht të ulëta, përfshirë përfitimet e mundshme nga subvencionet publike dhe kushtet veçanërisht të favorshme të prodhimit.
Në vetëm pesë vite, numri i prodhuesve europianë ka rënë nga 120 në 90, duke shënuar mbylljen e rreth 25% të kompanive që operonin në këtë treg.
Në të njëjtën periudhë është rritur ndjeshëm edhe vlera e importeve të arkivoleve prej druri nga Kina. Nga 16 milionë euro në vitin 2022, ajo arriti në 28 milionë euro në vitin 2025.
Kjo situatë ka nxitur kompanitë europiane të bashkohen për të mbrojtur sektorin dhe për ta çuar çështjen drejtpërdrejt në vëmendjen e institucioneve të Bashkimit Europian.
Diferenca e çmimeve dhe dyshimet për substancat e përdorura
Ajo që e bën veçanërisht të vështirë konkurrencën është diferenca e madhe në kostot e prodhimit. Sipas të dhënave të paraqitura nga eurodeputetët e partisë “Vëllezërit e Italisë” në një interpelancë drejtuar komisionerit europian për Tregtinë, Maroš Šefčovič, prodhimi i një arkivoli në Itali kushton mesatarisht 260 euro, ndërsa në Kinë vetëm 80 euro.
Ky hendek u mundëson prodhuesve aziatikë t'i ofrojnë produktet e tyre në tregun europian me çmime që variojnë nga 100 deri në 110 euro.
Sipas dokumentit, pas kësaj diference qëndrojnë disa faktorë, mes të cilëve kostoja shumë e ulët e fuqisë punëtore dhe e lëndës së parë drusore, ndihmat shtetërore dhe stimujt për eksportin që garanton qeveria e Pekinit.
Por shqetësimet nuk lidhen vetëm me çmimet. Në dosjen e paraqitur janë ngritur edhe dyshime për sigurinë e materialeve të përdorura në prodhimin e arkivoleve kineze.
Konkretisht, pretendohet se në këto produkte mund të përdoren bojëra toksike, të cilat janë të ndaluara në Bashkimin Europian. Gjatë procesit të kremimit, këto substanca mund të çlirojnë në atmosferë mikrogrimca kancerogjene, duke ngritur shqetësime për rreziqet e mundshme ndaj shëndetit dhe mjedisit. /PiranjatNews/
