Një tjetër tentativë e negociatorëve për të bindur 35-vjeçarin të dorëzohet është zhvilluar pak minut...
BOTA
A po përgatitet Suedia për luftë? Instalohet sistemi i alarmit në rast të një sulmi ajror
PiranjatPërditësimi i fundit 20 Shkurt 2026, 18:18
Suedia do të vendosë brenda këtij viti një sistem alarmi përmes telefonave celularë për të paralajmëruar qytetarët në rast sulmesh ajrore gjatë kohës së luftës. Lajmi u bë i ditur nga agjencia përgjegjëse për zhvillimin dhe zbatimin e planit, e cila theksoi se nisma është frymëzuar nga një sistem i ngjashëm i përdorur në Ukraine.
Aktualisht, Suedia disponon një sistem alarmi të jashtëm me rreth 4,500 sirena të vendosura në çati dhe ndërtesa të larta në të gjithë vendin. Megjithatë, sipas autoriteteve, përvoja e luftës në Ukrainë ka treguar se infrastruktura e tillë mund të bëhet objektiv i sulmeve.
“Bazuar në përvojat që kemi vëzhguar në Ukrainë, kemi zbuluar se armiku, në këtë rast Rusia, do të shkatërronte sistemin tonë të alarmit të jashtëm”, deklaroi për AFP-në Henrik Larsson, kreu i departamentit të mbrojtjes së popullsisë në Agjencinë Suedeze të Emergjencave Civile.
Sistemi i ri, i quajtur SE Alert, do të funksionojë përmes rrjetit të telekomunikacionit, duke dërguar automatikisht njoftime zanore, alarme dhe sinjale vibrimi në telefonat celularë në rast rreziku. Sipas Larsson, ai do të plotësojë sistemin ekzistues dhe pritet të hyjë në funksion gjatë gjashtë muajve të ardhshëm.
Përveç rasteve të luftës, sistemi mund të përdoret edhe për situata të rënda në kohë paqeje, si aksidente bërthamore apo kimike.
Ndërkohë, autoritetet suedeze po bashkëpunojnë me ushtrinë për zhvillimin e një aplikacioni që do t’u mundësojë qytetarëve të fotografojnë dronët e dyshimtë dhe të njoftojnë menjëherë institucionet përkatëse.
Pas pushtimit rus të Ukrainës në vitin 2022, Suedia ka rritur ndjeshëm masat e sigurisë dhe përgatitjen e saj në kuadër të asaj që e quan mbrojtje “gjithëpërfshirëse”.
