Abuzoi me 4 të mitur, dënohet ish-prifti në Angli, ishte burgosur edhe më parë për sulme seksuale

Prifti i dënuar

ANGLI- Një ish-prift katolik i dënuar për abuzim seksual me katër djem nga mosha 5 deri në 11 vjeç në vitet 1970 dhe 1980 u dënua së fundmi me 31 muaj burg nga një gjykatë në Londër. James Murphy, me origjinë nga Cork në Irlandë, u deklarua fajtor shkurtin e kaluar. Ish-prifti 77-vjeçar ishte dënuar më parë për sulme seksuale ndaj pesë djemve gjatë kohës së tij ku shërbente si klerik në pjesë të ndryshme të Mbretërisë së Bashkuar. Pas vuajtjes së dënimit prej 30 muajsh, ai u kthye në Kork ndërsa ishte shkarkuar nga Dioqeza vendase.

Hetimi më i fundit nga autoritetet filloi me ankesën e paraqitur nga një tjetër viktimë e klerikut pervers në vitin 2019. Autoritetet britanike zbuluan se ai kishte abuzuar me fëmijë të tjerë në kohën kur shërbente në një kishë në Sydenham ndërsa ai konsiderohej nga komuniteti vendas si një klerik i respektuar.

Policia mblodhi deklaratat e viktimave, dëshmitë e ekspertëve dhe udhëtoi në Cork dy herë gjatë pandemisë për të marrë në pyetje Murphy. Sipas shkresave të çështjes, 77-vjeçari u deklarua fajtor për tre akuzat e abuzimit kur u përball me provat, por mohoi të ketë abuzuar me viktimën e katërt. Hetimi vazhdoi pasi u gjykua e rëndësishme të dëgjohej historia e viktimës së katërt në gjykatë dhe të vërtetohej fajësia e Murphyt. Në gjyqin e fundit, një nga viktimat i tha gjykatës se ajo ishte abuzuar kur ishte 10 vjeç. Një tjetër viktimë e përshkroi Murphy-n si një njeri jashtëzakonisht të rrezikshëm, i cili u paraqit si një prift i virtytshëm.

prift angli abuzime seksuale te mitur