"Ajo çka pamë ne mjekët ishte e tmerrshme"/ Flet Dr. Sejfulla Ademi për rastin tragjik të Koçanit: Shumë viktima, shumë njerëz të djegur e shumë lot nga prindërit

MAQEDONI E VERIUT- Dr. Sejfulla Ademi ka folur për rëndësinë dhe rolin jetik të Ndihmës së Shpejtë në raste të tragjedive, në “Ftesë në studio” në Alsat. Doktori e përshkroi situatën e djeshme si tejet të rënduar. Ai tha se fillimisht ishim mjaftueshëm staf mjekësor por kur gjendja sa vinte e rëndohej, kishim nevoj për ndihmë nga qytetet e tjera. 

Duke folur për rastin tragjik në Koçan, Dr. Ademi përshkroi momentet e para të organizimit emergjent: Në natën e tragjedisë, diku nga mëngjesi, morëm një telefonatë nga Shtabi për Menaxhimin e Krizave dhe u pa e nevojshme të bëhej një koordinim i shpejtë për t’u dalë në ndihmë ekipeve mjekësore të atjeshme, të cilët tashmë ishin organizuar. Katër ekipe erdhën dhe tre ishim në ndërrim që iu dolëm në ndihmë kolegëve. Fillimisht, ishim mjaftueshëm, por situata ishte tejet e rënduar dhe duhej ndihmë edhe nga qytetet tjera.

Përshkrimi i tij për tragjedinë ishte i dhimbshëm: Ajo çka pamë ne mjekët ishte e tmerrshme, shumë viktima, shumë lotë nga prindërit, shumë njerëz të djegur.

Ai ngriti shqetësime serioze mbi kapacitetin dhe funksionimin e Ndihmës së Shpejtë, duke thënë se: Personeli i Ndihmës së Shpejtë është shumë i ngarkuar dhe punon me kapacitet shumë të vogël. Bëj apel deri te institucionet që të punësohet personel i ri dhe të përmirësohen kushtet për të punësuarit, pasi Ndihma e Shpejtë është sektori më i rëndësishëm, kontakti i parë pas çdo fatkeqësie.

Ai theksoi gjithashtu se sipas protokolleve evropiane, Shkupi duhet të ketë 25 ekipe të Ndihmës së Shpejtë, por aktualisht: Në ndërrimet e natës jemi vetëm 5 ekipe, ndërsa në ndërrimet e ditës me 6 ekipe të kompletuara me mjek, shofer dhe motër medicionale. Ky është vetëm një e pesta e kapacitetit që duhet të kemi.

Në fund, Dr. Ademi bëri apel për qytetarët me sëmundje kronike, duke u kërkuar që të marrin rregullisht terapitë e tyre, pasi në raste emergjente të tilla, është shumë e vështirë t’u ofrohet ndihmë shtesë në kohë.

maqedoni e veriut