Një biznesmen që kontrollon një prej depove farmaceutike më të njohura në Shqipëri është vënë nën he...
BOTA
Aksidentoi për vdekje 21-vjeçaren greke në Selanik, shtyhet gjyqi ndaj shoferit shqiptar
PiranjatPërditësimi i fundit 7 Janar 2026, 19:06
Gjykimi ndaj një 23-vjeçari shqiptar, i përfshirë në një aksident trafiku tragjik në Selanik që përfundoi me vdekjen e studentës greke Emma Karyotaki, është shtyrë deri në shtator të këtij viti. Ngjarja e rëndë ndodhi në nëntor 2022, në zonën e famshme të Kamaras, në qendër të Selanikut, kur një makinë me shpejtësi rreth 140 km/orë përplasi dhe plagosi për vdekje 21-vjeçaren, e cila studionte në Fakultetin e Shkencave Veterinare.
Shoferi i mjetit, një 30-vjeçar shqiptar, u dënua më parë në shkallë të parë me 16.5 vjet burg për shkak të aksidentit fatal. Por historia e hetimeve nuk mbaroi me kaq. Pas vendimit penal kundër shoferit, prindërit e Emmës nisën një proces tjetër ligjor kundër 23-vjeçarit pasagjer në makinën fatale. Fillimisht ai u shpall i pafajshëm nga gjykata për bashkëpunim në veprimet që çuan tek aksidenti, por tani është paditur për akuza të tjera.
Sipas padisë, pasagjeri nuk njoftoi autoritetet për gjendjen e shoferit pas aksidentit dhe nuk bëri asgjë për të penguar largimin nga vendi i shoferit të mëparshëm, pavarësisht rrezikut dhe përgjegjësisë që ka pasur si i pranishëm në mjet në momentin e ngjarjes.
Gjyqi i planifikuar të mbahej sot në Gjykatën e Kundërvajtjeve me Anëtar të Vetëm të Selanikut, u shty pasi çështja e kërkesës për dëmshpërblim, e ngritur nga familja e viktimës për vuajtje psikologjike ndaj pasagjerit, është në pritje të shqyrtimit në gjykatat civile.
