Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
BOTA
Danimarka kërkon rritjen e pranisë së NATO-s në Arktik dhe Groelandë pas kërcënimeve të Trump
PiranjatPërditësimi i fundit 22 Janar 2026, 23:48
Danimarka i ka kërkuar NATO-s të jetë më e pranishme në Arktik, tha të enjten kryeministrja daneze Mette Frederiksen, mes kërcënimeve të përsëritura nga Presidenti i SHBA-së Donald Trump për të kontrolluar Groenlandën, një territor gjysmë-autonom danez.
“Ne kemi nevojë për një prani të përhershme të NATO-s në rajonin e Arktikut, përfshirë edhe zonën përreth Groenlandës”, u tha Frederiksen gazetarëve përpara një samiti emergjent të BE-së në Bruksel.
"Është e qartë për të gjithë se ne jemi një shtet sovran dhe nuk mund të negociojmë për këtë. Por sigurisht që mund të diskutojmë me SHBA-në se si mund ta forcojmë bashkëpunimin tonë të përbashkët për sigurinë në rajonin e Arktikut", shtoi ajo.
Trump u tërhoq papritur të mërkurën nga kërcënimi i tij për tarifa ndaj tetë vendeve evropiane dhe përjashtoi përdorimin e forcës për të marrë Groenlandën, një territor gjysmëautonom i Danimarkës, aleatit të NATO-s, duke sugjeruar se një marrëveshje ishte në horizont.
Qeveritë e Bashkimit Evropian mbeten të kujdesshme ndaj një tjetër ndryshimi qëndrimi nga ana e një presidenti të paparashikueshëm, i cili gjithnjë e më shumë shihet si një figurë imponuese, ndaj së cilës Evropa do të duhet të tregojë vendosmëri.
Ato janë të përqendruara në hartimin e një strategjie afatgjatë për mënyrën se si të përballen me Shtetet e Bashkuara nën këtë administratë, por edhe nën administratat pasardhëse shkruan Reuters.
Pas dekadash mbështetjeje te Uashingtoni për mbrojtje brenda aleancës së NATO-s, bllokut i mungojnë inteligjenca, transporti, mbrojtja nga raketat dhe aftësitë prodhuese të nevojshme për t'u mbrojtur nga një sulm i mundshëm rus. Kjo i jep SHBA-së një ndikim të konsiderueshëm.
SHBA-të janë gjithashtu partneri më i madh tregtar i Evropës, duke e bërë BE-në të cenueshme ndaj politikave të Trump për vendosjen e tarifave për të ulur deficitin tregtar të mallrave të Uashingtonit dhe, si në rastin e Grenlandës, për të arritur qëllime të tjera. /Piranjat/
