Një autobus turistik që udhëtonte nga Holanda drejt Austrisë është përfshirë në një aksident të rë...
BOTA
Defekt në teleferik, 4 të plagosur dhe rreth 100 persona të bllokuar në Alpet italiane
PiranjatPërditësimi i fundit 30 Dhjetor 2025, 18:03
Një aksident është shënuar mëngjesin e së martës në një teleferik në zonën e Macugnaga, në provincën Verbano-Cusio-Ossola të Italisë, ku katër persona mbetën të plagosur dhe rreth 100 të tjerë u bllokuan për disa orë në lartësi. Sipas mediave italiane, aksidenti ndodhi kur kabina e teleferikut nuk arriti të ngadalësonte siç duhet gjatë hyrjes në stacion dhe u përplas me strukturën mbrojtëse të sigurisë. Si pasojë, u plagosën tre pasagjerë dhe një operator.
Drejtori ekzekutiv i kompanisë që administron teleferikun, Filippo Besocci, deklaroi për agjencinë ANSA se bëhet fjalë për një problem teknik në sistemin e frenimit. “Sistemi nuk funksionoi siç duhet dhe kabina goditi barrierën mbrojtëse. Fatmirësisht, nuk ka të lënduar rëndë”, u shpreh ai.
Sipas autoriteteve, gjashtë persona u përfshinë në incident, ndërsa më i lënduari është një burrë 59-vjeçar me dëmtime në dorë. Të tjerët pësuan vetëm gërvishtje të lehta.
Pas incidentit, rreth 100 persona mbetën të bllokuar në zonën Passo del Moro, në një lartësi prej rreth 2.800 metrash. Operacioni i evakuimit përfundoi rreth orës 14:45, me të gjithë pasagjerët të transportuar në mënyrë të sigurt në bazë.
