Një protestues i pranishëm para Ministrisë së Arsimit ka ironizuar efektivët e policisë për sjelljen e tyre gjatë protes...
BOTA
Dy ditë pas marrjes së detyrës Rutte vizitë në Kiev, takohet me Zelenskyyn: Prioritet, mbështetja perëndimore për Ukrainën, deri në fitore ndaj Rusisë
n.fPërditësimi i fundit 3 Tetor 2024, 19:00
Takimi
UKRAINË- Sekretari i ri i përgjithshëm i NATO-s, Mark Rutte ka zhvilluar vizitën e tij të parë në Kiev, dy ditë pas marrjes së detyrës. Gjatë vizitës Rutte përsëriti mbështetjen e NATO -s për Ukrainën, duke thënë se vendet perëndimore do ta mbështesin atë "deri në fitore" ndaj Rusisë.
Vizita vjen në një moment të vështirë për Ukrainën, forcat e së cilës po tërhiqen në frontin lindor, duke pësuar humbje në njerëz dhe armë, dhe ndërsa ka thirrje në rritje për negociata për t'i dhënë fund luftës, madje edhe midis aleatëve të Kievit. Më herët të enjten, Rusia konfirmoi se kishte pushtuar qytetin Buhlendar, të cilin e kishte luftuar ashpër për gati dy vjet.
"Është prioriteti im dhe privilegji im të promovoj mbështetjen perëndimore në mënyrë që Ukraina të fitojë," tha Rutte.
Presidenti ukrainas, Volodymyr Zelenskyy përsëriti ankesat që ka shprehur prej muajsh me aleatët e tij perëndimorë, të cilët i akuzon se kanë vonuar dërgesat e raketave me rreze të gjatë veprimi, sistemet e armëve në qendër të një debati nëse ato duhet të përdoren kundër tokës ruse. Kievi kërkon të lejohet të godasë objektiva thellë brenda Rusisë për të kufizuar aftësinë e Moskës për të goditur Ukrainën, por shumë nga aleatët e saj, përfshirë SHBA-në, po refuzojnë t'i japin dritën jeshile, nga frika e një përshkallëzimi të luftës.
Rutte është një nga mbështetësit e Ukrainës dhe është etiketuar si "rusofob" nga Moska. Ndër të tjera, ai kishte drejtuar përpjekjet për t'i dhënë avionëve luftarakë F-16 ukrainasve. Zelenskyy e quajti atë një "mik të madh" dhe kujtoi se qëllimi i Kievit është integrimi i plotë i Ukrainës në Traktatin e Atlantikut të Veriut.
