Dy mjekët e arrestuar në hetimin për vdekjen e Giorgos Mazonakis pritet të paraqiten para prokurorit sot, të prem...
BOTA
Shpërndahet Parlamenti i Izraelit, vendi drejt zgjedhjeve të parakohshme
PiranjatPërditësimi i fundit 20 Maj 2026, 21:04
Parlamenti i Izraelit ka miratuar nisjen e procedurës për shpërndarjen e Knesset, duke hapur rrugën për zgjedhje të parakohshme në vend.
Propozimi i opozitës u miratua me 53 vota pro dhe asnjë kundër. Tashmë projektligji do të kalojë në komisionet parlamentare, ku pritet të përcaktohet edhe data e zgjedhjeve.
Për miratimin përfundimtar nevojiten edhe dy votime të tjera në parlament, ku kërkohet shumica prej 61 deputetësh nga 120 gjithsej.
Nisma është paraqitur nga deputetja Pnina Tamano-Shata dhe lideri i partisë “Blu dhe Bardhë”, Benny Gantz.
Pas votimit, Gantz deklaroi se “ky është fillimi i fundit” për qeverinë aktuale të Benjamin Netanyahu.
“Kjo qeveri e dështuar do të largohet herët ose vonë”, tha ai.
Sipas projektligjit të opozitës, zgjedhjet do të zhvillohen 90 ditë pas miratimit përfundimtar të ligjit.
Izraeli po shkon drejt zgjedhjeve të parakohshme për shkak të krizës politike të krijuar nga çështja e shërbimit ushtarak për hebrenjtë ultra-ortodoksë. Partitë fetare ultra-ortodokse kanë tërhequr mbështetjen për qeverinë Netanyahu, pasi koalicioni nuk arriti të miratojë një ligj që do t’i përjashtonte ata përgjithmonë nga shërbimi i detyrueshëm ushtarak
