Kreu i Partisë Demokratike Sali Berisha komentoi zgjedhjet në Serbi, teksa Aleksandar Vuçiç ra nga pushteti pas 14 vitesh.
Berisha u ...
BOTA
Milano/ Polici pranon vrasjen e 28-vjeçarit në Rogoredo, zbulohen detaje të reja
PiranjatPërditësimi i fundit 24 Shkurt 2026, 15:18
Një ndihmës-shef i Policisë në Milano, Carmelo Cinturrino, është ndaluar për vrasjen e 28-vjeçarit Abderrahim Mansouri në zonën Rogoredo.
Ai ka pranuar përgjegjësinë, kërkon falje, por hetimet zbulojnë gjithashtu se ai kishte ushtruar dhunë ndaj personave të tjerë dhe kishte tentuar të manipulojë provat në vendin e ngjarjes.
Fjalët e agjentit të ndaluar për të shtënat në Rogoredo, të raportuara nga avokati i tij: ''Ai ka pranuar përgjegjësitë e tij''.
Marrja në pyetje për vërtetimin e ndalimit u zhvillua këtë mëngjes në burgun San Vittore në Milano. ''Si Cinturrino ashtu edhe nëna e tij luten për Mansourin''.
''Duhej të isha ai që zbaton ligjin, gabova. Kërkoj falje të gjithë atyre që veshin uniformën: Kam tradhtuar besimin e tyre''. Kështu është shprehur Carmelo Cinturrino, ndihmës-shef i Policisë, i ndaluar për vrasjen e Abderrahim Mansourit, përmes avokatit të tij Piero Porciani.
Këtë e deklaroi vetë mbrojtësi para hyrjes në burgun San Vittore për seancën para gjyqtarit hetues për vërtetimin e ndalimit. ''Ai ka pranuar përgjegjësitë e tij'', shtoi avokati.
''Kur pashë që Mansouri po vdiste, humba kontrollin'', mësohet të ketë pranuar Cinturrino para gjyqtarit Domenico Santoro.
Siç theksoi avokati, polici «kërkon falje atyre që i besuan. Ka pranuar gabimet, por ka mohuar se ka kërkuar para nga shpërndarësit e drogës». Agjenti iu përgjigj të gjitha pyetjeve të gjyqtarit dhe prokurorit Marcello Viola. Ai përsëriti se ka qëlluar 'nga frika' dhe më pas shtoi se ishte ndier 'i humbur', sepse «e di mirë çfarë ndodh me ata që qëllojnë». Ai ka tentuar 'të mbulojë situatën', duke urdhëruar kolegun të shkonte në komisariatin Mecenate për të marrë një kopje të armës.
Avokati sqaron se ishte ''një armë lodër që nuk duhej të regjistrohej, të cilën e kishte gjetur para pandemisë Covid në zonën Lambro dhe e kishte mbajtur''.
Cinturrino ka deklaruar se të gjithë agjentët, përveç një gruaje, që më 26 janar ndodheshin në rrugën Impastato, «e panë të merrte diçka nga makina dhe të vendoste një objekt pranë trupit të Mansourit», por ai «thotë se nuk e ka prekur trupin dhe ka thirrur menjëherë ndihmën e shpejtë».
I pyetur nëse qarkullonte me një çekiç, avokati sqaroi: ''Ishte një çekiç i vogël që e përdorte për të nxjerrë drogën që shpërndarësit e fshehin në zonën e gjelbër të Rogoredo-s.
Ndonjëherë kishte edhe një lopatë të vogël''.
Në orët në vijim, gjyqtari do të vendosë për vërtetimin e ndalimit dhe për masën e paraburgimit ndaj ndihmës-shefit të akuzuar për vrasje me dashje.
Avokati deklaroi gjithashtu: ''Kolegu i Cinturrinos që mori valixhen në komisariat nuk mund të mos e dinte çfarë kishte brenda''. ''Një gjë që Cinturrino dëshiron ta theksojë –shtoi avokati – është se nuk ka marrë asnjë qindarkë nga askush. Ma ka garantuar''.
Shefi i Policisë, Vittorio Pisani, duke iu referuar Cinturrinos, e quajti atë 'ish-polic' dhe 'delikuent'. ''Të përjashtohet nga shërbimi, jam dakord – tha avokati – sepse një person i tillë nuk mund të qëndrojë në administratë. Megjithatë, për mua “delikuent” është ai që kryen krime, jo ai që gabon. Janë dy gjëra të ndryshme''.
Sipas avokatit, Cinturrino «kërkon falje të gjithë atyre që u ka tradhtuar besimin. Është i trishtuar për familjen e tij, kolegët dhe administratën, të cilës i ka shërbyer për shumë vite». Sa i përket 28-vjeçarit që humbi jetën, «si ai ashtu edhe nëna e tij kanë shkuar në kishë për t’u lutur. Mendoj se është gjëja më e mirë që mund të bëhet».
Dëshmia e kolegut: ''U tregua i pamëshirshëm ndaj një personi me aftësi të kufizuara''. Një nga agjentët nën hetim për favorizim dhe mosdhënie ndihme ka deklaruar se Cinturrino 'kishte kërkuar para dhe drogë' dhe ishte dhunues: madje kishte goditur me çekiç një person me aftësi të kufizuara që frekuentonte zonën e Rogoredo. Për marrëdhënien me Mansourin, i njohur si Zack, agjenti tha: «E di që Cinturrino donte ta kapte''./Përshtati në shqip Piranjat News
