Tenderi 50 milionë euro për mirëmbajtjen e akseve rrugore kombëtare është është shndërruar në një skandal...
BOTA
Momenti prekës/ Astronautja e Artemis II, Christina Koch ribashkohet me qenin e saj
PiranjatPërditësimi i fundit 16 Prill 2026, 12:55
Të ndahesh nga qeni yt mund të jetë e vështirë, sidomos kur kjo ndarje përfshin nisjen në hapësirë — por kjo e bën ribashkimin edhe më të bukur. Në një postim në Instagram të shpërndarë të dielën, astronautja e NASA-s Christina Koch, një nga katër anëtarët e ekuipazhit të Artemis II, shihet duke hyrë në shtëpinë e saj pasi kthehet nga misioni hapësinor — dhe qeni i saj, Sadie, është gati “të shpërthejë” nga gëzimi.
Sadie shihet duke kërcyer te dera sapo Koch bëhet e dukshme përmes dritares. Bishti i saj tundet me vrull dhe leh nga gëzimi ndërsa Koch hyn brenda. Qeni, duke përjetuar atë që shumë e quajnë “zoomies” (vrapime nga emocionet), rend nga njëra anë në tjetrën të dhomës. “Ende jam e bindur se unë isha pala më e lumtur në këtë ribashkim,” shkroi Koch. “Sadie më mësoi gjithçka që duhej të dija për të qenë një kafshë mbështetëse emocionale. Nuk e prisja që kjo do të më hynte në punë.”
Në të njëjtin postim, Koch ndau edhe një video tjetër ku ajo dhe Sadie vrapojnë dhe kërcejnë së bashku në plazh dhe nëpër valët e detit.
Koch dhe anëtarët e tjerë të ekuipazhit të Artemis II — astronautët e NASA-s Reid Wiseman dhe Victor Glover si dhe astronauti i Agjencisë Hapësinore Kanadeze Jeremy Hansen — udhëtuan gjithsej 694,481 milje, duke e bërë fluturimin e tyre rreth Hënës udhëtimin më të largët që njerëzit kanë bërë ndonjëherë nga Toka. Rekordi i mëparshëm u vendos nga misioni Apollo 13 në vitin 1970.
Pas 10 ditësh në hapësirë, ekuipazhi i Artemis II u kthye në mënyrë të sigurt në Tokë të premten, duke u ulur në Oqeanin Paqësor pranë brigjeve të San Diegos.
Të dhënat nga misioni Artemis II ka të ngjarë të ndihmojnë në planifikimin e uljeve të ardhshme në Hënë.
“Shkenca e Artemis II do të hapë rrugën për misionet e ardhshme në sipërfaqen e Hënës duke ndihmuar në avancimin e operacioneve të misionit dhe duke trajnuar astronautët të përdorin gjykim të informuar mirë për të identifikuar zona me interes të lartë për shkencë dhe eksplorim,” shkroi NASA./Përktheu Piranjat News
