Kryetari i Grupit Parlamentar të Partisë Demokratike, Gazment Bardhi, ka akuzuar qeverinë për aferë korruptive lidhur me TEC-et lundr...
BOTA
Netanyahu: Izraeli do të intensifikojë sulmet kundër Hezbollahut
PiranjatPërditësimi i fundit 26 Maj 2026, 08:09
Ushtria izraelite ka nisur një valë të re sulmesh ajrore në të gjithë Libanin, pasi kryeministri izraelit Benjamin Netanyahu deklaroi se ofensiva kundër Hezbollahut do të intensifikohet.
Forcat Mbrojtëse të Izraelit (IDF) njoftuan se avionët luftarakë kanë goditur objektiva të Hezbollahut në Luginën Bekaa në lindje të Libanit, si edhe në zona të tjera të vendit. Nga ana tjetër, Hezbollahu tha se është kundërpërgjigjur me 22 sulme me dronë dhe raketa ndaj objektivave izraelite, duke përfshirë ushtarë, tanke, kazerma dhe ndërtesa ushtarake.
Përshkallëzimi i ri vjen pavarësisht armëpushimit 45-ditor të rënë dakord mes Libanit dhe Izraelit më herët këtë muaj, edhe pse përplasjet sporadike kanë vijuar.
Në një deklaratë video, Netanyahu tha se Izraeli është “në luftë me Hezbollahun” dhe se ushtria duhet t’i japë grupit “një goditje shkatërruese”. Sipas tij, ofensiva izraelite ka eliminuar mbi 600 militantë të Hezbollahut, ndërsa shtoi se tashmë kërkohet “rritja e intensitetit të sulmeve”.
Hezbollahu deklaroi se sulmet e tij ishin përgjigje ndaj asaj që e quajti “shkelje të armëpushimit” nga Izraeli. Ndërkohë, zyrtarë nga të dy vendet pritet të zhvillojnë negociata të reja në Uashington javën e ardhshme.
Presidenti i Libanit, Joseph Aoun, ka kërkuar tërheqjen e plotë të trupave izraelite nga jugu i Libanit.
Që prej hyrjes në fuqi të armëpushimit më 16 prill, Izraeli ka vazhduar sulmet kryesisht në jug të Libanit, ndërsa pretendon se nga ajo zonë janë lëshuar raketa dhe dronë kundër territorit të tij. Sulmet e fundit prekën edhe Luginën Bekaa, pranë kufirit me Sirinë.
