Detaje të reja janë mësuar në lidhje me ngjarjen në Roskovec, ku Besmir Mustaj ka qëlluar me armë zjarri në portë...
BOTA
Nga nënë e dashur te akuza për vrasjen e tre fëmijëve – çfarë fsheh Lindsay Clancy?
PiranjatPërditësimi i fundit 23 Shkurt 2026, 13:11
Mbrëmjen e 24 janarit 2023, një telefonatë emergjence nga një shtëpi në Duxbury shënoi fillimin e një prej krimeve më tronditëse në SHBA. Në qendër ishte Lindsay Clancy, 32 vjeçe, infermiere pediatrike dhe nënë e tre fëmijëve – Cora (5 vjeçe), Dawson (3 vjeç) dhe Callan (8 muajsh).
Lindsay u akuzua për vrasjen e tre fëmijëve të saj brenda shtëpisë. Që prej asaj dite, çështja ka evoluar në një proces të ndërlikuar penal, ku përplasen dy analiza: një akt i paramenduar apo një krize e rëndë mendore.
Muajt para tragjedisë
Sipas dokumenteve gjyqësore, pas lindjes së fëmijës së tretë, Clancy kishte kërkuar ndihmë për ankth, depresion pas lindjes dhe pagjumësi kronike. Ajo kishte provuar medikamente psikiatrike, përfshirë antidepresivë dhe barna kundër ankthit. Avokatët e saj argumentojnë se kombinimi i medikamenteve dhe përkeqësimi i gjendjes psikologjike ndikoi në gjykimin e saj.
Prokuroria, nga ana tjetër, ka theksuar se nuk kishte diagnozë për psikozë dhe sjellja e saj para ngjarjes nuk tregonte shkëputje nga realiteti.
Dita e krimit
Sipas hetimit, dita nisi normalisht: fëmijët u dërguan tek pediatri dhe luajtën në borë. Më vonë, Lindsay i kërkoi bashkëshortit, Patrick Clancy, të dilte për ushqim dhe barna, duke krijuar një interval prej 25-30 minutash. Kur ai u kthye, gjeti një skenë tragjike: tre fëmijët u gjetën në bodrum, të pajetë, me shenja mbytjeje.
Pas aktit, Lindsay dyshohet se tentoi vetëvrasje, duke u hedhur nga dritarja në katin e dytë, dhe mbeti e paralizuar nga mesi e poshtë.
Akuzat
Lindsay përballet me:
1. Tre akuza për vrasje në shkallë të parë
2. Tre akuza për mbytje me ushtrim force
3. Tre akuza për sulm me qëllim vrasjen
Prokuroria argumenton planifikim: dërgimi i bashkëshortit larg shtëpisë dhe përzgjedhja e intervalit kohor. Mbrojtja thekson ç’rregullimin e rëndë mendor në momentin e ngjarjes dhe trajtime të mëparshme psikiatrike.
Qëndrimi i familjes
Patrick Clancy tha se sjellja e gruas nuk ngriti asnjë shenjë alarmi dhe e përshkroi si një nënë të dashur. Prindërit e Lindsay-t janë shprehur se vajza e tyre gjithmonë ka qenë e përkushtuar dhe e dashur.
Gjyqi
Më 20 shkurt, Lindsay u paraqit për herë të parë fizikisht në gjykatë. Çështja e saj ligjore përfshin vlerësim psikiatrik dhe debat mbi përgjegjësinë penale në kushtet e sëmundjes mendore. Gjyqi është caktuar për korrik 2026.
Rasti i Lindsay Clancy është kthyer në simbol të debatit mbi kufirin mes sëmundjes mendore dhe përgjegjësisë penale. Ai teston edhe mënyrën se si sistemi ligjor amerikan trajton rastet ku krimi dhe çrregullimi mendor ndërthuren në mënyrë tragjike
