Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
BOTA
Rrëzimi i regjimit, SHBA paralajmëron embargo të plotë të energjisë ndaj Kubës
PiranjatPërditësimi i fundit 23 Janar 2026, 23:17
Administrata e Donald Trump po shqyrton mundësinë e vendosjes së një embargoje të plotë ndaj importeve të naftës për Kubën, si pjesë e strategjive të mundshme për të ndryshuar regjimin në vendin e Karaibeve, raporton Politico, duke cituar tre burime të njohura me planet e qeverisë.
Edhe pse ende nuk është marrë një vendim për miratimin e masës, disa kritikë të qeverisë kubane brenda administratës së Trump-it e mbështesin këtë hap, ndërsa sipas Politico, përkrahja i jepet edhe nga sekretari i Shtetit, Marco Rubio.
Bllokimi i transportit të naftës drejt Kubës do të shënonte një përshkallëzim të mëtejshëm pas vendimit të Trump për të bllokuar naftën nga Venezuela. Megjithatë, brenda qeverisë amerikane ka debate se sa i domosdoshëm është ky hap, pasi mungesa e naftës nga Venezuela ka rënduar ndjeshëm ekonominë kubane, dhe një embargo totale mund të shkaktojë një krizë humanitare.
“Diskutimet tregojnë se sa larg janë të gatshëm të shkojnë zyrtarët e administratës Trump ndaj qeverive të Amerikës Latine që i konsiderojnë kundërshtare,” thekson Politico.
Një nga burimet që ka njohuri për planet, thekson: “Energjia është arma që do të rrëzojë regjimin.” Administrata e Trump e konsideron rrëzimin e qeverisë komuniste kubane, e cila është në pushtet që nga revolucioni i vitit 1959, si një ngjarje që “do të ndodhë 100% në 2026.”
Sipas burimeve, ky hap mund të mbështetet ligjërisht nga ligji amerikan LIBERTAD i vitit 1994, i njohur si ligji Helms-Burton, që legjitimon embargon ndaj tregtisë dhe transaksioneve financiare me Kubën.
Kuba importon rreth 60% të nevojave të saj për naftë, sipas Agjencisë Ndërkombëtare të Energjisë. Deri kohët e fundit, vendi mbështetej kryesisht tek Venezuela, por administrata Trump ka nisur të bllokojë disa transportime nafte. Sot, roli i furnizuesit kryesor i takon Meksikës, megjithëse sasia e importuar nuk mjafton për të mbuluar plotësisht deficitin energjetik në rritje të Kubës.
