Policia e Shtetit ka nxjerrë një shkresë urgjente drejtuar komisariateve të Tiranës, ku kërkon marrjen e një sërë...
BOTA
Skandali me Epstein/ Princit Andrew i reduktohet stafi, por do të vazhdojë të quhet ‘Sir’
PiranjatPërditësimi i fundit 23 Shkurt 2026, 08:55
Shërbëtorët mbretërorë janë urdhëruar të vazhdojnë ta thërrasin Andrew Mountbatten-Windsor-in “Sir”, pavarësisht skandaleve të fundit.
Ish-princi është informuar se tani do të ketë vetëm një staf minimal, i përbërë nga një kuzhinier dhe një shërbëtor personal, pas dekadash gjatë të cilave ishte shërbyer nga dhjetëra punonjës.
Andrew kaloi fundjavën i vetëm në banesën e tij të re në pronën Sandringham, pas arrestimit të bujshëm të së enjtes, nën dyshimin për shpërdorim detyre në funksion publik.
66-vjeçari është vendosur përkohësisht në Wood Farm, në pritje që shtëpia e tij e re e përhershme në Marsh Farm të rinovohet.
Atij i është thënë se do t’i caktohet vetëm një kuzhinier dhe një punonjës i përgjithshëm, të cilët ende nuk janë punësuar.
Aktualisht, shoqërinë ia bëjnë vetëm efektivët e policisë dhe të sigurisë, si dhe shtatë qentë e tij, përfshirë dy qen të racës corgi që i përkisnin Mbretëreshës së ndjerë.
Mësohet se stafi ka pyetur se si duhet ta adresojë Andrew-n, pasi atij iu hoqën titujt mbretërorë vitin e kaluar nga Mbreti Charles, pas zbulimeve të reja për lidhjet e tij me financierin e dënuar për abuzime seksuale, Jeffrey Epstein.
Sipas burimeve thuhet se: “Ai i ka humbur titujt ‘Lartmadhëria e Tij’, princ dhe dukë, ndaj stafi nuk dinte si ta thërriste. U është thënë se duhet ta quajnë ende ‘Sir’. Ai do të ketë vetëm një kuzhinier dhe një shërbëtor personal në Marsh Farm, gjë që përbën një rënie të madhe nga luksi që kishte më parë.”
Në rezidencën e tij të mëparshme në Royal Lodge në Windsor, Andrew kishte shërbëtorë personalë, kuzhinierë, kamerierë, pastruese dhe shumë punonjës të tjerë. Po ashtu, kishte një staf të madh edhe në apartamentin e tij në Pallatin Buckingham.
Gazeta “The Sun” kishte zbuluar më herët se punonjësit mbretërorë kishin kundërshtuar shërbimin ndaj tij kur u transferua në Sandringham. Ata u lejuan të refuzonin të punonin për të, nëse ndiheshin të parehatshëm.
Andrew kishte paguar në vitin 2022 rreth 12 milionë paund për të mbyllur padinë e Virginia Giuffre, e cila e kishte akuzuar për abuzim seksual. Ai është akuzuar gjithashtu se ka trajtuar keq stafin para rënies së tij nga fama.
Punonjësit e tij të rinj do të punësohen pasi ai të zhvendoset në Marsh Farm, por rinovimet janë vonuar dhe ekziston frika se ai mund të qëndrojë për një kohë të gjatë në Wood Farm.
Mësohet se Mbreti Charles po financon aktualisht jetesën dhe pensionimin e vëllait të tij më të vogël, për të shmangur që ai të bëhet barrë për të tjerët. Paratë e taksapaguesve nuk do të përdoren për mbrojtjen e tij ligjore.
Andrew është afruar me avokatin Gary Bloxsome, i cili e shoqëroi në janar 2022 kur iu hoqën rolet mbretërore nga Mbretëresha e ndjerë.
Burime thonë se avokati ishte quajtur “Good News Gary”, sepse dyshohej se nuk ia kishte shpjeguar qartë klientit situatën e rëndë në të cilën ndodhej.
Pas 11 orësh në paraburgim, Andrew u kthye në Wood Farm, ish-shtëpia e pensionimit të Princit Philip. Tym dilte nga oxhaqet, perdet ishin të mbyllura dhe policia patrullonte jashtë.
Ai u arrestua në orën 08:00 të mëngjesit, pikërisht në ditëlindjen e tij të 66-të, dhe u lirua në mbrëmje.
Ndërkohë, policia vazhdoi kontrollin në banesën e tij të mëparshme në Royal Lodge.
Hetimi lidhet me email-e të zbuluara nga koha kur ai ishte i dërguar tregtar i Mbretërisë së Bashkuar, të cilat dolën në dosjet Epstein.
Një banor i zonës, i quajtur Ben, tha:
“Nuk u habita aspak. Mendoj se opinioni publik është dakord që ai duhet të japë llogari për atë që ka bërë.”
Ai shtoi se Familja Mbretërore është përpjekur të distancohet plotësisht nga Andrew.
Mbreti Charles ndodhej dje në Kështjellën Windsor, ndërsa Princi dhe Princesha e Uellsit ishin në Anmer Hall, pranë Wood Farm.
Muajin e kaluar u zbulua se Mbreti po paguante për rinovimin e Marsh Farm, por puna është ndalur dhe shtëpia nuk është aq luksoze sa pritej.
Andrew ka vizituar disa herë pronën për të parë ecurinë e punimeve, por sipas burimeve, ajo nuk do të jetë gati për Pashkë.
Më herët ishte raportuar se stafi në Pallatin Buckingham ishte trajnuar të rreshtonte lodrat e tij prej pellushi sipas madhësisë çdo mëngjes.
Ai kishte detyruar gjithashtu një shërbyese të vraponte katër kate shkallë për të mbyllur perdet, duke e bërë atë të shpërthente në lot.
Ish-kuzhinieri mbretëror, Dan Ottaway, ka deklaruar se Andrew ishte më kërkues se anëtarët e tjerë të familjes mbretërore dhe shpesh sillej në mënyrë të pahijshme me stafin./Përktheu Piranjat News
