Ashtu siç pritej, protestuesit janë mbledhur para Kuvendit, ndërkohë që policia ka blinduar zonën duke vendosur gardhë me...
BOTA
Transferimi i fëmijëve ukrainas drejt Rusisë, OKB e konsideron krim lufte, ja gjetjet e raportit
PiranjatPërditësimi i fundit 10 Mars 2026, 22:24
Raporti i OKB-së konsideron transferimin e fëmijëve ukrainas drejt Rusisë dhe Bjellorusisë si krim lufte dhe krim kundër njerëzimit Dëbimi dhe transferimi me forcë i fëmijëve ukrainas në Rusi përbën një krim kundër njerëzimit dhe një krim lufte, ka thënë OKB-ja. Një raport i ri nga Komisioni i Pavarur Ndërkombëtar i Hetimit për Ukrainën thotë se autoritetet ruse “në nivelet më të larta” kanë deportuar “mijëra” fëmijë nga zonat e pushtuara të Ukrainës.
Ai shton se “përfshirja e drejtpërdrejtë” e Vladimir Putinit ka qenë “e dukshme që nga fillimi”.
Ukraina thotë se pothuajse 20,000 fëmijë janë dërguar në mënyrë të paligjshme në Rusi dhe Bjellorusi. Komisioni i OKB-së deri tani ka identifikuar 1,205 raste të fëmijëve që u morën nga territoret ukrainase nga Moska në vitin 2022. Sipas raportit, 80 për qind e këtyre fëmijëve ende nuk janë kthyer dhe shumë prindër apo kujdestarë edhe sot nuk e dinë vendndodhjen e të miturve. Kjo përbën zhdukje të detyruar dhe vonesë të pajustifikueshme në riatdhesim, të cilat sipas OKB-së janë përkatësisht krime kundër njerëzimit dhe krime lufte.
Shumica e fëmijëve të përmendur në raportin e OKB-së jetonin në të ashtuquajturat Republika Popullore të Donetskut dhe Luhanskut, rajone ukrainase për të cilat Moska pretendon në mënyrë të paligjshme kontroll. Raporti thotë se pak para se të niste pushtimin e plotë të Ukrainës, Moska i evakuoi këta fëmijë në Federatën Ruse, duke pretenduar se ata rrezikoheshin nga një sulm i afërt ukrainas. Më pas, fëmijët u vendosën në familje ose institucione dhe morën shtetësi ruse.
Moska gjithmonë i ka hedhur poshtë akuzat se ka larguar me forcë fëmijë nga territori ukrainas.
Vladimir Putin ka thënë një herë se “historia e ‘rrëmbimeve të fëmijëve’… ishte e ekzagjeruar” dhe ka këmbëngulur se fëmijët në fjalë ishin “shpëtuar” nga një zonë lufte. Në atë kohë ai gjithashtu tha se “nuk kishte problem” për kthimin e fëmijëve në atdheun e tyre. Por Kievi gjithmonë ka argumentuar se kjo nuk është e vërtetë dhe raporti i OKB-së thotë se fëmijët kanë hasur vështirësi të mëdha për t’u kthyer në Ukrainë. Sipas OKB-së, largimi i detyruar dhe ndërprerja e lidhjeve me atdheun e tyre, së bashku me një “mjedis detyrues” në Rusi, “ka qenë burim i një shqetësimi të thellë për fëmijët”.
Fëmijët që arrijnë të kthehen vuajnë nga “trauma, ankthi dhe frika nga braktisja”, thuhet në raport, shpesh për shkak të trajtimit të ashpër në Rusi. Një fëmije iu tha nga stafi i një jetimoreje ruse se vendi i tij, Ukraina, “nuk ekziston më, gjithçka është djegur dhe prindërit e tu ndoshta kanë vdekur”.
“Unë ende po kërkoj vajzën time dhe kam shumë frikë se çfarë mund të mendojë ajo për mua dhe si po mbijeton [në Rusi], ku shumë njerëz i urrejnë ukrainasit,” citohet në raport një nënë që nuk ka arritur të gjejë fëmijën e saj.
Në vitin 2023, Gjykata Penale Ndërkombëtare (ICC) lëshoi një urdhër arresti për Putinin, duke e akuzuar atë dhe komisioneren për të drejtat e fëmijëve, Maria Lvova-Belova, për deportimin e paligjshëm të fëmijëve ukrainas.
Lvova-Belova dha një intervistë ku përshkroi se kishte “marrë nën kujdes” një djalë 15-vjeçar nga qyteti ukrainas Mariupol, i cili aktualisht është i pushtuar nga Rusia, dhe se e kishte “riedukuar”, pavarësisht faktit që ai “nuk donte të shkonte” në Rusi.
Ukraina thotë se deri tani ka arritur të rikthejë rreth 2,000 fëmijë. Raportohet se Zonja e Parë e SHBA-së, Melania Trump, është përfshirë në përpjekjet për ribashkimin e fëmijëve me familjet e tyre. Vitin e kaluar, ajo tha se kishte një “kanal të hapur komunikimi” me Putinin pasi ai iu përgjigj një letre të saj ku shprehte shqetësimin për fëmijët viktima të luftës Rusi-Ukrainë. Lufta në Ukrainë vazhdon pa ndërprerje, pavarësisht disa raundeve bisedimesh mes delegacioneve negociuese të Moskës dhe Kievit dhe, së fundmi, edhe një delegacioni amerikan.
Konflikti, tashmë në vitin e tij të pestë, ka vrarë më shumë se 15,000 civilë, ka plagosur më shumë se 41,300 dhe ka zhvendosur 3.7 milionë njerëz.
