Vulin reagon ndaj deklaratave të O'Brien: Të armatosësh të ashtuquajturën Ushtri të Kosovës dhe të flasësh për paqen është si të lësh një gjarpër në djep!

Vulin

SERBI- Zëvendëskryeministri i Serbisë Aleksandër Vulin së fundmi ka bërë një reagim ndaj deklaratave të zyrtarit të lartë të Departamentit të Shtetit, James O’Brien. Ky i fundit u shpreh se  Beogradi nuk ka dërguar kurrë armë në Ukrainë, madje as në Rusi.

Në reagimin e tij Vulin akuzoi O'Brien se po kërkon të prishë raportet mes Serbisë dhe Rusisë. Ai më tej komentoi edhe në lidhje me furnizimet me armë ku nuk u kursye me kritikat ndaj SHBA-ve për ndihmën që i jep Kosovës.

“Të armatosësh të ashtuquajturën Ushtri të Kosovës dhe të flasësh për paqen është si të lësh një gjarpër në djep dhe të flasësh për ekologjinë, ashtu siç nuk mund t'i referohesh Dejtonit dhe të kërcënosh se do të shfuqizosh Republika Srpska ose do të votoni për rezolutën për Srebrenicën dhe të pretendoni se nuk është e drejtuar kundër serbëve”, tha Vulin.

Ai më tej akuzoi O’Brien se përdor standarde të dyfishta kur bëhet fjalë për parimin e integritetit territorial, duke pranuar se tashmë Kosova është një realitet i pakthyeshëm për Serbinë.

“Kuptimi i parimit të integritetit territorial është se kufijtë janë të pacenueshëm. Kjo vlen për të gjitha shtetet ose asnjërën prej tyre. Duke njohur të ashtuquajturën Kosovë, SHBA-të dhe shtetet tjera që vranë të drejtën ndërkombëtare me agresionin e tyre ndaj Serbisë filluan proceset që janë të pandalshme,” shtoi ai.

vulin kosova serbia