Goditet grupi kriminal në Athinë/ 5 të arrestuar për tentativë vrasje, shqiptari Klod Cara jepte urdhra nga qelia

Policia greke ka zhvilluar një operacion që prej orëve të para të sotëm për goditjen e një grupi kriminal, anëtarët e të cilit dyshohet se janë përfshirë në gjobvënie, vjedhje, shpërthime me granata dhe tentativë vrasjeje.

Sipas mediave greke, hetimet e zhvilluara nga FBI-ja greke kanë ngritur dyshime se organizata drejtohej nga shqiptari Klodian Lekocaj, i njohur edhe si Klod Cara, pavarësisht se ai ndodhet pas hekurave në burgun e Trikallas. Në kuadër të operacionit janë arrestuar pesë persona që jetonin në Athinë. Ndërkohë, si bashkëpunëtorë të dyshuar të Lekocajt përmenden edhe tre të burgosur të tjerë, njëri në burgun e Malandrinos dhe dy shtetas egjiptianë në burgjet e Avlonës dhe Malandrinos.

Hetuesit dyshojnë se grupi qëndron pas dy sulmeve me granata në fillim të shtatorit, kur u goditën dy biznese në qendër të Athinës, duke shkaktuar dëme materiale. Një tjetër sulm dyshohet se është kryer në fillim të tetorit, kur një granatë u hodh jashtë një dyqani ku ndodheshin tetë klientë. Granata nuk shpërtheu ndërsa nga ngjarja nuk u raportuan persona të lënduar.

Kush është Klod Cara?

Klodian Lekocaj, alias Klod Cara, është një shqiptar me origjinë nga Berati, emri i të cilit është përmendur prej vitesh në hetimet e autoriteteve greke për krime të rënda. Ai është cilësuar nga mediat greke si drejtuesi i dyshuar i të ashtuquajturës “Mafia e Burgjeve”, një rrjet kriminal që organizonte veprimtari të paligjshme edhe nga brenda institucioneve të vuajtjes së dënimit.

Emri i Lekocajt është lidhur në hetime të mëparshme me vrasje, kërcënime, gjobvënie dhe trafik droge, ndërsa është përmendur edhe në çështjen e vrasjes së avokatit grek Mihalis Zafiropoulos. Në operacionin e fundit, autoritetet greke dyshojnë se ai vijonte të kishte rol drejtues në organizatë nga burgu i Trikallas, duke bashkëpunuar me persona të tjerë të burgosur dhe anëtarë të grupit që vepronin jashtë institucioneve penitenciare.

Hetimet vijojnë për të përcaktuar përgjegjësitë e secilit prej të dyshuarve dhe për të dokumentuar të gjitha episodet kriminale që mund të lidhen me këtë organizatë.