Autoritetet në Afrikën e Jugut vijojnë hetimet për vdekjen e papritur të futbollistit Jayden Adams, mesfushorit të Mamelodi Sund...
INVESTIGIME
Mori kredi 65 mijë euro për të blerë tokën në Theth, qytetarit i shesin dy herë tokën
PiranjatPërditësimi i fundit 26 Shtator 2025, 21:05
Një histori mashtrimi dhe konfliktesh pronësie ka shpërthyer në Theth, një nga perlat turistike të Alpeve shqiptare. Gjoni, banor i zonës, pretendon se në vitin 2018 bleu 11 dynym tokë nga familja Praçaj, duke paguar 65 mijë euro me kontratë noteriale.
Paratë, sipas tij, shkuan kryesisht për të shlyer borxhet e njërit prej trashëgimtarëve. Megjithatë, ndonëse shumica e familjarëve firmosën, njëra nga trashëgimtaret, Vera, nuk ishte në Shqipëri dhe nuk nënshkroi.
“Kam dhënë 42 mijë euro në bankë ne emër të Gjovalinit. Prisja që Vera të vinte për firmën dhe pjesën tjetër të parave, por kur e takova, më tha: mos i jep lekë askujt, se unë nuk di gjë që toka është shitur”- rrëfen Gjoni.
Ndërkohë, në vitin 2022, e njëjta tokë është rishitur për vetëm 30 mijë euro te një blerës i dytë, këtë herë me firmën e Verës në kontratë.
Vetëm tre ditë më pas, blerësi i dytë e ka rishitur sërish për një çmim edhe më të ulët, duke ngritur dyshime për manovra fiktive. Familja Praçaj, e përfshirë në marrëveshje, ka dhënë versione kontradiktore. Nëna Lula e pranoi se i kishte marrë paratë e Gjonit për të larë borxhet e djalit, ndërsa vajza, Agetina e quajti thjesht një “marrëveshje borxhi” dhe jo shitje toke.
Avokati i palës dëmtuese thotë se problemi qëndron edhe te mosveprimi i ASHK-së, pasi aplikimi i Gjonit për regjistrim nuk figuron në sistem, ndonëse pagesat janë bërë.
“Pa më vrarë mua, këtë tokë nuk e gëzon askush. Unë kam investuar gjithë jetën, me kredi e me mundim. Nuk e lë tokën!” – shprehet Gjoni i revoltuar.
Çështja tashmë është në prokurori dhe gjykatë, ndërsa pala e dëmtuar thotë se nuk do të ndalet deri sa të marrë pronën, që e quan të vetën./ piranjat.al
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi sipas nenit 179 të Ligjit 35/2016
