Pak javë më parë ju treguam skemën që ka nisur të aplikohet në masë nga ekzekutivi për të anashkaluar transpar...
BOTA
Italia nuk gjen qetësi nga protestat, mbi 100 mijë persona mbushin rrugët e Romës
PiranjatPërditësimi i fundit 30 October 2026, 19:42
Roma u përfshi të premten, më 30 tetor, nga protesta masive në kuadër të grevës së përgjithshme të organizuar nga sindikata USB (Unione Sindacale di Base), kundër rritjes së kostos së jetesës dhe politikave të riarmatimit.
Demonstrata, ku morën pjesë studentë, aktivistë dhe përfaqësues të lëvizjeve sociale, u shoqërua me përplasje mes grupeve të protestuesve dhe forcave të rendit në disa zona të kryeqytetit italian.
Sipas organizatorëve, rreth 100 mijë persona morën pjesë në mobilizimin në Romë, shifër që nuk ka marrë konfirmim të pavarur.
Protesta nisi me marshimin e demonstruesve drejt qendrës historike, ndërsa një pjesë e tyre ngritën tenda pranë Koloseut dhe paralajmëruan se do të vijonin mobilizimin. Situata u tensionua kur një grup prej rreth 300 personash, disa me fytyra të mbuluara, u shkëput nga marshimi dhe u përplas me policinë në zonën Celio.
Sipas raportimeve të gazetës italiane Corriere della Sera, protestuesit hodhën gurë, shishe dhe sende të tjera drejt efektivëve, ndërsa disa prej tyre u vunë flakën kazanëve të mbeturinave për të ngritur barrikada. Policia ndërhyri me gaz lotsjellës dhe operacione për shpërndarjen e grupeve që tentuan të kalonin kordonët e sigurisë.
Tensionet vijuan gjatë pasdites pranë Ministrisë së Arsimit, në lagjen Trastevere, ku rreth 2 mijë demonstrues marshuan duke kundërshtuar luftën dhe politikat e qeverisë. Disa protestues hodhën vezë me bojë të kuqe drejt forcave të rendit.
Më vonë, një pjesë e demonstruesve tentuan të arrinin në Parlament, duke u përballur me kordonët policorë në urën Ponte Sisto dhe në zonën Testaccio. Gjatë incidenteve pati hedhje të mjeteve piroteknike dhe sendeve të forta, ndërsa policia përdori edhe autobotë me ujë për të penguar kalimin.
Autoritetet mbyllën për publikun sheshet përpara Palazzo Chigi, selisë së qeverisë italiane, dhe Palazzo Montecitorio, ku ndodhet Dhoma e Deputetëve. Forcat e rendit vendosën masa të përforcuara sigurie rreth institucioneve kryesore.
Sipas raportimeve të fundit, policia ndaloi tetë persona në lidhje me incidentet gjatë protestës.
Ndërkohë, ish-kryebashkiaku i Romës, Gianni Alemanno, deklaroi se një grup demonstruesish kishte sulmuar automjetin me të cilin udhëtonte dhe se kishte paraqitur kallëzim në polici. Pretendimet e tij nuk janë konfirmuar në mënyrë të pavarur.
Protesta e 30 tetorit nxori në pah kundërshtimet e sindikatave dhe lëvizjeve studentore ndaj kostos së jetesës dhe shpenzimeve për riarmatim në Itali. Mobilizimi u shoqërua me kufizime të qarkullimit rrugor dhe masa të shtuara sigurie në qendër të Romës.
