Një javë më parë, kreu i Sindikatës së Pavarur të Punonjësve të Policisë së Shtetit, Sadetin Fishta, deno...
INVESTIGIME
Skandali me Albtrace & Co/ Miliona euro për oligarkët e huaj dhe zhvatja e qytetarëve
PiranjatPërditësimi i fundit 30 October 2026, 22:35
Pak javë më parë ju treguam skemën që ka nisur të aplikohet në masë nga ekzekutivi për të anashkaluar transparencën, llogaridhënien dhe për të shmangur përgjegjësinë penale nga paracaktimi i fituesit të një kontrate. Modeli i gjetur është krijimi i kompanive publike, të cilat kanë detyrimin të respektojnë rregullat e prokurimit publik, por nuk kalojnë pagesat përmes Thesarit të Shtetit, ku jo vetëm duhet të zbatojnë ligjin e menaxhimit të sistemit buxhetor, por edhe të aplikojnë në bazë ditore çdo qindarkë se ku e kanë çuar.
Por ky është vetëm fillimi, sepse kompanitë shtetërore të krijuara për një shërbim publik të caktuar themelojnë nënkompani, tek të cilat zotërojnë më pas më shumë se 50% të aksioneve, duke eliminuar kështu detyrimin për t'iu nënshtruar rregullave të prokurimit publik dhe auditimit nga Kontrolli i Lartë i Shtetit.
Sot do të ndalemi tek rasti i firmës me kapital të përbashkët shtetëror dhe privat, Albtrace & Co, e cila prej vitit 2025 ka të drejtat ekskluzive në prodhimin dhe shpërndarjen e pullave fiskale për të gjitha mallrat e akcizës që tregtohen në vend.
Por si nisi historia e kësaj kompanie?
Në vitin 2011, qeveria Berisha vendosi të jepte me koncesion prodhimin dhe shpërndarjen e pullave fiskale për birrën, alkoolin, duhanin dhe barnat. Për këtë të fundit, angazhimi nuk u përmbush ndonjëherë. Kontrata me kohëzgjatje 10-vjeçare u kundërshtua nga opozita e atëhershme, Partia Socialiste, e cila premtoi se do të ishte një nga koncesionet që do të prishte nëse do të vinte në pushtet.
Socialistët erdhën në pushtet dy vite më pas, por kontrata vijoi, madje u zgjat me 24 muaj të tjerë.
Madje, u miratuan ndryshimet ligjore ku, në ligjin për akcizat, prodhimi dhe shpërndarja e pullave fiskale u lanë monopol shtetëror. Por vitet kaluan pa ndryshuar asgjë.
Këshilli i Ministrave autorizoi ndërmarrjen publike Shtypshkronja e Letrave me Vlerë për të prodhuar dhe shpërndarë pullat fiskale, por edhe për të marrë në dorëzim pajisjet e koncesionarit SICPA, sipas detyrimit që ky i fundit kishte në kontratë për t'i transferuar në fund të periudhës koncesionare në pronësi të shtetit.
Por cili ishte qëllimi i vërtetë?! Fare e thjeshtë: duhej të vijonte të mbahej një koncesion i fshehtë me një kompani private dhe publikut t'i shitej sikur të ardhurat e faturimit të biznesit për pullat do t'i merrte shteti.
Më datë 12 mars 2025 krijohet kompania Albtrace & Co, ku 51% të aksioneve janë në pronësi të Shtypshkronjës së Letrave me Vlerë dhe 49% të tjera të kompanisë O & S Security Solution. Kjo e fundit rezulton të jetë themeluar në tetor të vitit 2023, rreth një vit para se të bëhej ky bashkëpunim, dhe si bazë ka Emiratet e Bashkuara Arabe.
Tani le të shohim pak se kush është pas saj.
Firma zotërohet në 60% nga Oumolat Security Printing dhe 40% nga SICPA, degë e shoqërisë SICPA në Zvicër, e cila kishte në zotërim më parë koncesionin e pullave fiskale. Skema është e qartë: nuk u bë asnjë kontratë koncesionare, por shërbimi iu kalua privatit, të njëjtit që ishte. Madje, duke shkelur ligjin për Akcizat dhe atë për koncesionet dhe PPP-të.
Por çfarë ka për të thënë drejtori i Shtypshkronjës së Letrave me Vlerë për këtë rast?
Përballë mikrofonit të Piranjave, ai hesht duke mos thënë asnjë fjalë se si një kompani me bazë në Emiratet e Bashkuara Arabe merr paratë e qytetarëve shqiptarë. Nuk dha asnjë përgjigje nëse kishte dijeni që kompania Albtrace & Co i kontrakton pullat fiskale tek aksioneri O & S Security Solution pa hapur garë dhe përse e ka lejuar diçka të tillë.
Për më shumë, ndiqni investigimin e plotë të Piranjave./ Piranjat news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi.
