Abdul Ballout, 21 vjeçari i cili dyshohet se kreu sulmin terrorist në Berlin, është vrarë këtë të diel, 26 korrik, g...
LIFESTYLE
“Brightly Shining”, libri i muajit i Dua Lipës për dhjetorin 2025: Një rrëfim festiv me dritë, dhimbje dhe shpresë
PiranjatPërditësimi i fundit 24 Dhjetor 2025, 16:49
Këngëtarja me famë botërore Dua Lipa ka zbuluar librin e saj të preferuar për muajin dhjetor 2025, duke e quajtur “Brightly Shining” një lexim të përkryer festiv, të mbushur me mrekulli, shpresë dhe magji, por edhe me një dimension më të errët emocional, karakteristik për zgjedhjet e saj letrare.
Libri është shkruar nga autorja norvegjeze Ingvild Rishøi dhe është përkthyer mjeshtërisht në anglisht nga Caroline Waight. Sipas Dua Lipës, romani përbën një ripunim bashkëkohor të përrallës së dhimbshme të Hans Christian Andersen, “Vajza e vogël me shkrepëse”, duke e sjellë atë në një realitet modern dhe prekës, transmeton KultPlus.
Ngjarja zhvillohet në Oslo dhe ndjek historinë e dy motrave, Ronja dhe Melissa, të cilat përpiqen të mbajnë familjen të bashkuar së bashku me babanë e tyre, i cili lufton me alkoolizmin. Edhe pse babai i do vajzat e tij pafund – “drita e tyre është aq e fortë sa i dhembin sytë”, siç përshkruhet në libër – dashuria nuk mjafton për të paguar qiranë, për të mbushur frigoriferin apo për ta larguar atë nga pijet. Me afrimin e dimrit dhe rikthimin e varësisë, situata e familjes fillon të përkeqësohet me shpejtësi.
Rreth kësaj familjeje të brishtë, sipas Dua Lipës, rrotullohet një galeri personazhesh të zakonshëm, por të mirë, “heronj të përditshëm” që i japin ngrohtësi dhe zemër këtij libri të vogël, por me ndikim të madh. Një nga mesazhet kyçe të veprës është besimi se mrekullitë ndodhin, sidomos kur duket se nuk ka më asnjë rrugëdalje.
“Ky libër më qëndroi gjatë në mendje,” shprehet Dua Lipa. “Më bëri të reflektoj për familjet e prekura nga varësia, për njerëzit e pambrojtur që jetojnë në skajet e shoqërisë dhe për rëndësinë e komunitetit, veçanërisht në këtë kohë të vitit. Më kujtoi gjithashtu se sa shumë gjestet e vogla të mirësisë mund të jenë vërtet një mrekulli.”
Me këtë rekomandim, Dua Lipa fton lexuesit që gjatë festave të fundvitit të zgjedhin një libër që jo vetëm ngroh shpirtin, por edhe nxit empatinë, reflektimin dhe ndjeshmërinë ndaj atyre që përballen me vështirësi të heshtura.
