Numri i aksidenteve rrugore në Shqipëri ka vijuar të rritet gjatë vitit 2026, duke arritur në 1,090 aksidente në periudh&eu...
POLITIKE
Lubonja: Regjimi autoritar i Ramës po bashkon qytetarët në protesta
PiranjatPërditësimi i fundit 27 October 2026, 14:22
Analisti Fatos Lubonja, i ftuar në emisionin “Minuta e Parë” në News24, ka komentuar protestat studentore kundër kryeministrit Edi Rama, si dhe zhvillimet politike në Serbi pas rënies politike të Aleksandar Vuçiçit.
Sipas tij, protestat në të dy vendet kanë të përbashkët kundërshtimin ndaj qeverisjes autoritare, por ndryshojnë në aftësinë për të krijuar një organizim të përbashkët.
I pyetur nëse Edi Rama mund të konsiderohet autokrati i fundit në Ballkan, Lubonja u shpreh se një përfundim i tillë është optimist, pasi demokracia dhe liria kërkojnë vigjilencë të vazhdueshme.
“Kjo më tingëllon optimiste, pasi liria dhe demokracia janë motive për të cilat duhet të luftojmë çdo ditë. Nëse ne humbasim vigjilencën, mund të na lindin autokratë”, deklaroi Lubonja.
Duke analizuar lëvizjet protestuese në Shqipëri dhe Serbi, Lubonja theksoi se tipari kryesor i përbashkët është natyra heterogjene e tyre.
Në këto protesta, sipas tij, marrin pjesë qytetarë me bindje të ndryshme politike dhe ideologjike, nga liberalët demokratë dhe të majtët, te ekologjistët, konservatorët dhe profesionistët pa një orientim të përcaktuar politik.
Ajo që i bashkon këto grupe është kundërshtimi ndaj mënyrës së qeverisjes, të cilën analisti e cilësoi autoritare.
“I bashkon regjimi autoritar që ka ndërtuar Vuçiçi, me kërkesa delegjitimuese që i imponohen demokracisë. Ka media të kapura, korrupsion. Ne mund të shtojmë krimin e organizuar, që mund ta kemi më të shpeshtë këtu. Ne kemi si synim largimin e Ramës”, u shpreh ai.
Sipas Lubonjës, ndryshimi kryesor mes Shqipërisë dhe Serbisë qëndron te aftësia e protestuesve për t’u organizuar rreth një qëllimi të përbashkët. Ai vlerësoi se studentët serbë arritën të krijonin një organizim të përbashkët, përmes “Listës së Studentëve”, ndërsa në Shqipëri grupimet e ndryshme nuk kanë arritur të kapërcejnë ndasitë mes tyre.
“Ndryshimi mes Shqipërisë dhe Serbisë është se këta të fundit u bashkuan për të rrëzuar regjimin e Vuçiçit. Ata u bashkuan dhe krijuan ‘Listën e Studentëve’, me studentë dhe profesorë. Ajo ku kemi dështuar ne është bashkimi, aftësia për ta bërë këtë gjë, që ka të bëjë me çështjet tona kulturore”, deklaroi Lubonja.
