Neslihan Atagül ribashkohet me vajzën e saj nga “Kara Sevda” pas shumë vitesh

Fansat e serialit të njohur turk “Kara Sevda” janë rikthyer pas në kohë, pas një takimi që ka zgjuar nostalgji në rrjetet sociale. Aktorja Neslihan Atagül është ribashkuar pas shumë vitesh me Arven Beren, vogëlushen që interpretoi vajzën e saj, Deniz, në këtë serial.

Takimi u zhvillua gjatë promovimit të librit të parë për fëmijë të aktores, me titull “Bu Evde Bir Afet Var” (Në këtë shtëpi ka një Afet). Prania e Arven Beren në këtë event tërhoqi menjëherë vëmendjen, ndërsa fotot e tyre u shpërndanë me shpejtësi në rrjetet sociale.

Që nga përfundimi i “Kara Sevda”, kanë kaluar disa vite dhe ndryshimi në pamjen e Arven Beren është i dukshëm. Ajo, e cila në serial shfaqej si një bebe, sot është rritur ndjeshëm, duke surprizuar fansat që e kujtojnë ende në rolin e vogëlushes Deniz.

“Kara Sevda”, me protagonistë Neslihan Atagül, Burak Özçivit dhe Kaan Urgancıoğlu, u transmetua gjatë viteve 2015–2017. Seriali kishte dy sezone dhe gjithsej 74 episode, duke u kthyer në një sukses të madh jo vetëm në Turqi, por edhe në arenën ndërkombëtare, ku u njoh me titullin “Endless Love” dhe në Shqipëri si "Dashuri e Pafund".

Në këtë histori, Arven Beren interpretoi Deniz, vajzën e Nihan dhe Kemal, një personazh që pati rëndësi në zhvillimin e ngjarjeve të serialit. Pikërisht ky rol bëri që vogëlushja të mbetej në kujtesën e publikut, ndërsa ribashkimi i saj me Neslihan Atagül riktheu emocionet dhe kujtimet e fansave për historinë e tyre në ekran.

Ndërkohë, takimi u zhvillua në një moment të rëndësishëm për karrierën e aktores turke, e cila ka zgjeruar aktivitetin e saj edhe në letërsi për fëmijë. Libri i saj i parë, “Bu Evde Bir Afet Var”, është botuar nga shtëpia botuese Elma dhe sjell historinë e Afet, një qenushjeje të ëmbël dhe aventurave të saj teksa përshtatet me një familje të re.