Ku shkuan fondet e rikonstruksionit?/ Shkolla në Durrës reklamon kontributin e prindit, por kush mban përgjegjësi për mirëmbajtjen?

Pas denoncimit të publikuar nga Piranjat News për problematikat në shkollën 9-vjeçare “Bajram Curri” në Durrës, vjen një tjetër reagim nga vetë institucioni arsimor, këtë herë përmes një postimi në rrjetet sociale.

Shkolla ka zgjedhur të promovojë kontributin e një prindi, i cili, sipas postimit, ka vënë në dispozicion kohën dhe punën e tij për vendosjen e emrit të shkollës, tabelave orientuese dhe elementeve dekorative në ambientet e brendshme.

Kontributi vullnetar i një prindi është sigurisht i mirëpritur dhe askush nuk e vë në diskutim dëshirën e qytetarëve për të kontribuar në përmirësimin e ambienteve ku mësojnë fëmijët e tyre.

Por çështja që ngre pikëpyetje është tjetër: A duhet të mbështetet mirëmbajtja dhe përmirësimi i shkollave publike te vullneti dhe xhepi i prindërve?

Pas denoncimit të qytetarëve te Piranjat News për kërkesat financiare drejtuar prindërve për pastrimin, lyerjen dhe ndërhyrje të tjera në shkollë, tani ngrihet një tjetër pikëpyetje. Nëse për rikonstruksionin e shkollës janë miratuar fonde publike, si është administruar ky investim dhe kush mban përgjegjësi për përfundimin dhe mirëmbajtjen e ambienteve?

Piranjat News rikthen në vëmendje shqetësimin e prindërve: kontributi duhet të jetë zgjedhje dhe jo detyrim i imponuar, ndërsa shkollat publike duhet të garantojnë kushte dinjitoze për nxënësit përmes fondeve të parashikuara për këtë qëllim.

Ku përfunduan paratë e investimit dhe pse prindërit duhet të vazhdojnë të kontribuojnë për nevoja që duhet të mbulohen nga institucionet përgjegjëse?