Detaje të reja janë mësuar në lidhje me ngjarjen në Roskovec, ku Besmir Mustaj ka qëlluar me armë zjarri në portë...
POLITIKE
Boçi nga Dibra: Reforma Territoriale e vitit 2014 dështoi, po zbrazet Shqipëria
PiranjatPërditësimi i fundit 22 Maj 2026, 18:17
Partia Demokratike e Shqipërisë dhe Komisioni i Posaçëm Parlamentar për Reformën Administrativo-Territoriale zhvilluan dëgjesën e radhës në Dibër, ku morën pjesë qytetarë, përfaqësues të pushtetit vendor dhe aktorë të shoqërisë civile.
Në fjalën e tij, bashkëkryetari i Komisionit dhe nënkryetari i PD-së, Luciano Boçi, deklaroi se reforma territoriale e vitit 2014 ka dështuar dhe se pasojat e saj po ndihen sidomos në zonat rurale.
“Ne besojmë se arkitektura e shtetit në territor është Reforma Territoriale dhe ajo nuk është pronë e qeverisë, por pronë e qytetarëve. Nëse realizojmë një reformë pa konsultuar qytetarët, atëherë kemi një reformë pa taban, si ajo e vitit 2014”, u shpreh Boçi.
Sipas tij, problemi kryesor i reformës ishte mungesa e konsultimit publik dhe mënyra se si u ndërtua procesi.
“Difekti kryesor i reformës së vitit 2014 ishte pikërisht moskonsiderimi i mendimit të qytetarëve. Reforma nisi nga harta dhe përfundoi tek kompetencat dhe qytetarët, duke krijuar probleme serioze”, deklaroi ai.
Boçi tha se dëgjesat publike janë të domosdoshme për të kuptuar nëse reforma ka përmirësuar jetën e qytetarëve dhe shërbimet në territor.
“A u përmirësua jeta e qytetarit në Dibër? A është i përfaqësuar qytetari në këshillat bashkiakë? A i merr qytetari shërbimet? A janë të njëjta shërbimet në të gjithë territorin?”, pyeti ai gjatë fjalës së tij.
Nënkryetari i PD-së akuzoi qeverinë se nuk realizoi premtimet për autonomi fiskale dhe decentralizim.
“Qeveria premtoi autonomi fiskale dhe nuk e realizoi. Premtoi kompetenca për pushtetin vendor dhe nuk i përmbushi. Premtoi shërbime më të mira dhe qytetarët thonë se kjo nuk ndodhi”, deklaroi Boçi.
Ai shtoi se reforma ka thelluar pabarazitë mes bashkive dhe ka ndikuar në shpopullimin e zonave rurale.
“Kjo reformë prodhoi thellim të pabarazisë. Kush ishte bashki e varfër u bë edhe më e varfër. Prandaj kemi sot shpopullim të zonave rurale. Dhe jo vetëm migrim të brendshëm, por emigrim jashtë Shqipërisë”, tha ai.
Boçi e cilësoi reformën e vitit 2014 si një “reformë partiake” dhe jo administrative.
“Dibra ka rreth 150 mijë banorë dhe vetëm 4 bashki, ndërsa Gjirokastra, me më pak banorë, ka 7 bashki. Pse ndodh kjo? Sepse reforma e vitit 2014 nuk ishte reformë administrative-territoriale, por reformë partiake”, deklaroi ai.
Në fund, Boçi mbrojti nevojën për forcimin e pushtetit vendor dhe bashkëpunimin ndërbashkiak.
“Një bashki e fortë duhet të ndihmojë një bashki më të dobët. Duam të forcojmë qarqet dhe t’u japim kompetenca reale, sepse kështu mund të zgjidhim problemin e shërbimeve dhe decentralizimit”, përfundoi ai.
