Të rinjtë protestues kanë refuzuar thirrjet për dialog me kryeministrin Edi Rama.
Gjatë protestës, studentët kanë p&e...
POLITIKE
Boçi: Reforma territoriale e 2014 ka dështuar, pa konsensus ajo mbetet e kotë
PiranjatPërditësimi i fundit 28 Prill 2026, 18:25
Në Elbasan ka nisur takimi i tretë i Komisionit të Posaçëm Parlamentar për Reformën Administrative Territoriale, në kuadër të dëgjesave publike me qytetarët, përpara hartimit të propozimeve konkrete për reformën.
Bashkryetari i Komisionit, Luciano Boçi, theksoi rëndësinë e këtyre dëgjesave si baza reale për vendimmarrje politike, duke nënvizuar se politikat e qëndrueshme duhet të burojnë nga problemet konkrete të qytetarëve dhe jo nga vendime të shkëputura nga realiteti. Boçi pranoi se prania e tij në këtë proces mund të perceptohet si e ndërlidhur me qytetin, por e cilësoi këtë si një vlerë të shtuar: si banor, si politikan i formuar në Elbasan dhe si pjesë e botës akademike, ai argumentoi se përfshirja e drejtpërdrejtë rrit përgjegjësinë dhe cilësinë e debatit.
Ai ngriti shqetësime konkrete mbi pasojat e reformës së vitit 2014–2015, duke përmendur mungesën e investimeve në bujqësi, nivelin e ulët të shërbimeve publike dhe mungesën e përfaqësimit për zona të tëra, veçanërisht në zonat rurale. Sipas tij, këto problematika kanë ndikuar drejtpërdrejt në përkeqësimin e jetës së qytetarëve dhe në rritjen e fenomenit të shpopullimit.
‘Pyetja thelbësore është: a e lehtësoi kjo reformë jetën e qytetarëve? Të gjitha raportet ndërkombëtare dhe vëzhgimet vendase tregojnë se jo,’ u shpreh ai. Boçi theksoi se reforma territoriale nuk duhet parë thjesht si një ndryshim hartash, por si një instrument për të përmirësuar modelin e qeverisjes vendore, duke e bërë atë më afër qytetarit dhe më efikase në ofrimin e shërbimeve.
Në këtë kuadër, ai deklaroi gatishmërinë e Partisë Demokratike për të mbështetur çdo ndryshim ligjor që forcon kompetencat e pushtetit vendor dhe rrit autonominë e tij, por duke e lidhur këtë domosdoshmërisht me një rishikim të hartës territoriale. Sipas tij, kjo nuk është një çështje politike apo partiake, por një kërkesë e drejtpërdrejtë e qytetarëve për më shumë përfaqësim dhe shërbime më cilësore.
Në fund, Boçi sqaroi se reforma territoriale nuk është një detyrim i drejtpërdrejtë i procesit të integrimit europian, por mund të ndikojë ndjeshëm në rritjen e eficiencës në përdorimin e fondeve dhe në përmirësimin e qeverisjes vendore. Në vijim të dëgjesës publike të zhvilluar në Elbasan, bashkryetari i Komisionit të Posaçëm për Reformën Administrative Territoriale, Luciano Boçi, reagoi gjatë replikave me qytetarët, duke vënë në pikëpyetje vetë thelbin e rishikimit të reformës së vitit 2014.
Ai ngriti një pyetje thelbësore mbi arsyet e ndërhyrjes në hartën aktuale administrative:
“Nëse reforma e vitit 2014 ka qenë e mirë, atëherë pse po kërkojmë sot rishikim? Nuk mund të përsëriten të njëjtat argumente si atëherë, pa u treguar konkretisht ku qëndron problemi sot.”
Boçi theksoi se një proces i tillë nuk mund të përsëritë gabimet e së kaluarës, duke kujtuar se opozita ka qenë pjesë e komisionit të reformës në vitin 2014, por sipas tij është përjashtuar nga vendimmarrja përfundimtare.
“Sot, nëse secila palë del me hartat e veta pa dakordësi, gjithçka bëhet e kotë. Këtu nuk bëhet fjalë për forcë politike, por për konsensus. Ne duam një reformë për të gjithë shqiptarët,” u shpreh ai.
Replika e Boçit erdhi pas një serie pyetjesh dhe komentesh nga qytetarë të pranishëm në dëgjesë, jo vetëm nga Elbasani, por edhe nga zona të tjera të qarkut si Gramsh dhe Prrenjas, të cilët ngritën shqetësime mbi mungesën e shërbimeve, përfaqësimit dhe investimeve në zonat e tyre. Diskutimet reflektuan një shqetësim të gjerë mbi efektet e reformës aktuale dhe nevojën për një qasje më gjithëpërfshirëse në hartimin e modelit të ri të qeverisjes vendore.
