Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Koalicioni ”Bashkë Fitojmë”, pa numërues votash në gjysmën e vendit
PiranjatPërditësimi i fundit 24 Prill 2023, 22:15
Komisioneri Shtetëror i Zgjedhjeve, Ilirian Celibashi, vendosi të hënën që anëtari i katërt në Grupet e Numërimit të Votave, GNV, do të caktohet me short mes Partisë së Lirisë dhe Partisë Drejtësi Integrim dhe Unitet, PDIU, duke e lënë koalicionin opozitar “Bashkë Fitojmë” pa numërues në gjysmën e vendit.
Sipas vendimit, Partia e Lirisë dhe PDIU do të kenë mundësinë që të propozojnë secila anëtarë në 50 për qind të grupeve të numërimit në vend, pasi u konsideruan parti opozitare me numër të barabartë deputetësh.
Partia e Lirisë pretendoi se i takonte asaj anëtari i katërt në të gjithë GNV-të dhe se PDIU nuk ishte një parti opozitare.
“Dy deputetë të PDIU-së kanë deklaruar se janë të pavarur pas zgjedhjeve të 2017-ës,”tha përfaqësuesi i koalicionit opozitar në KQZ, Altin Kaziaj.
Po ashtu, ai iu referua votimit të kësaj partie në Kuvend, ku qëndrimet e saj kanë qenë pro qeverisë duke votuar ligje apo ratifikime marrëveshjesh të propozuara prej saj.
PDIU, e cila garon e vetme në zgjedhjet vendore të 14 majit i kundërshtoi këto pretendime dhe kërkoi që të zbatohej ligji dhe t’i njihej e drejta si parti opozitare për të pasur numëruesit e saj.
Grupet e numërimit përbëhen nga 4 anëtarë, ku dy anëtarë ndahen mes Partisë Socialiste dhe Partisë Demokratike, ndërsa anëtari i tretë dhe i katërt caktohet nga partitë e vogla të mazhorancës dhe opozitës.
Si parti e dytë e maxhorancës, Partia Socialdemokrate e Tom Doshit vendosi të mos e ushtrojë këtë të drejtë, ndaj Celibashi tha se anëtari i tretë i GNV-ve do të propozohet sërish nga PS. Komisioneri Celibashi tha se e kuptonte sensibilitetin që kishte konstituimi i grupeve të numërimit, por shtoi se pavarësisht se kush i propozon anëtarët e GNV-ve, prezumohet se janë garantë të ligjit. “Sistemi është konsoliduar mjaftueshëm për të dhënë garanci,” -theksoi ai para se të deklaronte vendimmarrjen për ta hedhur në short mes dy partive të drejtën për të propozuar anëtarin e 4-t të QNV-ve./BIRN
