"Një hap i rëndësishëm drejt vijimit të bisedimeve!" Mbledhja e Komitetit të Përfaqësuesve të Përhershëm, BE: Shqipëria të ndajë qëndrimin e saj lidhur me Kapitullin 6

BRUKSEL- Në mbledhjen e sotme të Komitetit të Përfaqësuesve të Përhershëm (Coreper), ambasadorët e shteteve anëtare të BE-së vendosën të kërkojnë nga Shqipëria që të ndajë qëndrimin e saj lidhur me Kapitullin 6, që i referohet politikës së jashtme.

Sipas tyre, ky hap i mundëson Bashkimit Evropian të fillojë punën për përgatitjen e qëndrimit të tij të përbashkët, me synimin për të realizuar Konferencën Ndërqeveritare të radhës me Shqipërinë.

Me anë të një postimi në platformën 'X', të Presidencës hungareze të BE-së, thuhet se kjo kërkesë ndaj Shqipërisë është një hap i rëndësishëm drejt vijimit të bisedimeve për integrimin drejt Bashkimit Evropian.

Shqipëria bisedimet konkrete të anëtarësimit me Bashkimin Europian më 15 tetor të këtij viti për grupkapitujt e parë, me organizimin në Luksemburg të Konferencës së dytë ndërqeveritare. I quajtur "Themeloret", ky grupkapitujsh, është dhe më kryesori. Ai hapet i pari dhe mbyllet i fundit.

Shqipëria mori nga Komisioni Evropian rekomandimin për hapjen e bisedimeve në vitin 2018 ndërsa nga Këshilli Evropian në mars të viti 2020. U deshën dy vite të tjera që mes Shqipërisë dhe Bashkimit Evropian të mbahej, konferenca e parë ndërqeveritare. Vetëm më 15 tetor 2024, pas edhe dy vitesh të tjera, vendi ka hyrë realisht në procesin e anëtarësimit, me nisjen e bisedimeve për grupkapitujt e parë.

be