Një veshkë derri e modifikuar gjenetikisht ka mbajtur gjallë dhe pa dializë një 66-vjeçar për plot nëntë muaj, p&...
POLITIKE
Përplaset me Besfor Lamallarin, Ina Zhupa: Po bën avokatin e vrasësit të Kalasë, turp të të vijë
PiranjatPërditësimi i fundit 9 Tetor 2025, 10:40
Deputetja e Partisë Demokratike, Ina Zhupa, i është kthyer ashpër ministrit të Drejtësisë, Besfort Lamallari, duke kërkuar dorëheqjen e tij dhe të ministres së Brendshme pas vrasjes së gjyqtarit Astrit Kalaja. Ajo i akuzoi ata për dështim në garantimin e sigurisë së qytetarëve dhe aktorëve të drejtësisë.
Zhupa e quajti të turpshme veprimin e Lamallarit, duke e akuzuar për mbrojtjen e një "vrasësi", dhe për neglizhencën në përmbushjen e detyrave që ka si ministër i Drejtësisë. "Turp të vijë ty që sot këtu po bën avokatin e një vrasësi. Turp që si zv.ministër i Brendshëm nuk i je përgjigjur thirrjes për ndihmë që të ka bërë KLGJ", tha Zhupa.
Ajo e ngarkoi ministrin dhe ministren e Brendshme me përgjegjësinë për vrasjen e gjyqtarit, duke theksuar se përfaqësuesit e qeverisë duhet të ishin ata që mbronin gjyqtarët dhe personat në institucionet e drejtësisë. "Kur policia e shtetit thotë se nuk kam kapacitet për të mbrojtur një gjyqtar, çfarë kapaciteti keni ju për të siguruar jetën e qytetarëve shqiptarë?", shtoi Zhupa.
Deputetja e PD-së e cilësoi gjithashtu këtë ngjarje si një dështim të madh të reformës në drejtësi dhe të keqqeverisjes së qeverisë aktuale. Ajo theksoi se këto janë rezultatet e politikës qeverisëse që, sipas saj, ka lënë pa mbrojtje institucionet e drejtësisë dhe qytetarët.
"Ne mbajmë një minutë heshtje për viktimat, por kjo nuk do të thotë që Kuvendi duhet të heshtë. Ju keni tejkaluar çdo skenar dhe këto që po ndodhin, nuk janë më thjesht nëpër filma, sepse Shqipëria sot nuk ofron siguri", tha Zhupa, duke kërkuar që të dy ministrat të japin dorëheqjen për përgjegjësitë e tyre.
